തിരുവനന്തപുരം: ലോകാരോഗ്യ സംഘടന അംഗീകരിച്ച സര്‍ജിക്കല്‍ സേഫ്റ്റി ചെക്ക്‌ലിസ്റ്റ് സമ്പ്രദായം മെഡിക്കല്‍ കോളജ് ആശുപത്രിയില്‍ ആരംഭിച്ചു. ഇന്നലെ രാവിലെ മെഡിക്കല്‍ കോളജ് പ്രിന്‍സിപ്പല്‍ ഡോ. തോമസ് മാത്യു പുതിയ സംവിധാനത്തിന്റെ ഉദ്ഘാടനം നിര്‍വഹിച്ചു.
ഓപറേഷന്‍ ടേബിളില്‍ കിടക്കുന്ന രോഗിക്ക് തനിക്ക് ലഭിക്കുന്ന ചികിത്സയെപ്പറ്റി വ്യക്തമായ ധാരണ ലഭ്യമാക്കുക എന്നതാണ് ഈ പദ്ധതി കൊണ്ട് ലക്ഷ്യമിടുന്നത്. സംസ്ഥാനത്ത് ആദ്യമായാണ് ഈ സംവിധാനം നിലവില്‍ വരുന്നത്.
രോഗിയെ ശസ്ത്രക്രിയ ടേബിളില്‍ കിടത്തിയ ശേഷം സര്‍ജന്‍, അനസ്‌തേഷ്യ നല്‍കുന്ന ഡോക്ടര്‍, നഴ്‌സ് എന്നിവരെല്ലാം പ്രത്യേകം പ്രത്യേകമായി രോഗവിവരങ്ങളും ചികിത്സയെപ്പറ്റിയും പറയുകയും ചികിത്സയെന്തെന്ന് രോഗിക്ക് മനസിലാക്കാനായി ചില ചോദ്യങ്ങള്‍ അങ്ങോട്ടു ചോദിക്കുകയും ചെയ്യും. അവയെല്ലാം സര്‍ജിക്കല്‍ സേഫ്റ്റി ചെക്ക്‌ലിസ്റ്റില്‍ മാര്‍ക്ക് ചെയ്ത ശേഷം മാത്രമാണ് ശസ്ത്രക്രിയ ആരംഭിക്കുന്നത്. ഇതോടെ രോഗികള്‍ക്ക് ചികിത്സയെപ്പറ്റിയുള്ള സംശയങ്ങളും തെറ്റിദ്ധാരണകളും ഒഴിവാക്കാനാകും. ചെക്ക്‌ലിസ്റ്റിന്റെ പകര്‍പ്പ് കേസ് ഷീറ്റിലും ഉള്‍പ്പെടുത്തും.
അനസ്‌തേഷ്യോളജി വിഭാഗത്തിന്റെയും ജനറല്‍ സര്‍ജറി വിഭാഗത്തിന്റെയും സംയുക്താഭിമുഖ്യത്തില്‍ എ തിയറ്ററില്‍ നടന്ന ഉദ്ഘാടന ചടങ്ങില്‍ ജനറല്‍ സര്‍ജറി വിഭാഗം മേധാവി ഡോ. അബ്ദുല്‍ ലത്തീഫ്, അനസ്‌തേഷ്യോളജി വിഭാഗം മേധാവി ഡോ. മധുസൂദനന്‍ നായര്‍, ഡോ. വിശ്വനാഥന്‍, എ.ആര്‍.എം.ഒ ഡോ. ഷിജു മജീദ്, ഡോ. സുല്‍ഫിക്കര്‍, ഹെഡ് സിസ്റ്റര്‍ സുനന്ദ സംബന്ധിച്ചു.