വാടാനപ്പള്ളി: തൃശൂര്‍ കാഞ്ഞാണി റൂട്ടില്‍ ബി.എം.എസ് ബസ് തൊഴിലാളി യൂനിയന്‍ ആഹ്വാനം ചെയ്ത അനിശ്ചിതകാല സമരത്തില്‍ നിന്ന് മറ്റ് യൂനിയനുകളും തൊഴിലാളികളും ഉടമകളും പിന്മാറിയതിനെ തുടര്‍ന്ന് സമരം പരാജയപ്പെട്ടു.
ഇതിനിടെ  സര്‍വിസ് നടത്താന്‍ തയാറായ ബസുകള്‍ക്ക് നേരെ വ്യാപക കല്ലേറ്. ബസ് തടഞ്ഞവരെ പിടിച്ചുമാറ്റാന്‍ ശ്രമിക്കുന്നതിനിടെ രണ്ട് പൊലിസുകാര്‍ക്ക് പരുക്കേറ്റു. അന്തിക്കാട് എസ്.ഐ കെ.എസ് സുനീഷ്, സി.പി.ഒ ഷറഫുദ്ദീന്‍ എന്നിവര്‍ക്കാണു പരുക്കേറ്റത്.
കൈ കാലുകള്‍ക്ക് മുറിവേറ്റ ഇരുവരും വാടാനപ്പള്ളി സാമൂഹികാരോഗ്യ കേന്ദ്രത്തില്‍ പ്രഥമ ചികിത്സ നേടി. അതിനിടെ കല്ലേറുണ്ടായിട്ടും പണിമുടക്ക് അവഗണിച്ച് ഭൂരിഭാഗം ബസുകളും സര്‍വിസ് നടത്തി.
കിരണ്‍ മോട്ടോര്‍ സര്‍വിസിന്റെ മൂന്ന് ബസുകളും ഗ്രാന്‍ഡ് മോട്ടോഴ്‌സിന്റെ രണ്ടും ഐഷ, ബട്ടര്‍ഫ്‌ലൈ, അന്നപൂര്‍ണേശ്വരി എന്നീ ഓരോ ബസുകളുമാണു കാഞ്ഞാണി, വാടാനപ്പള്ളി, കണ്ടശ്ശാങ്കടവ് മേഖലകളിലായി ആക്രമിക്കപ്പെട്ടത്. ഇന്നലെ പുലര്‍ച്ചെ കാഞ്ഞാണി സ്റ്റാന്റ്, കണ്ടശ്ശാങ്കടവ്, കാഞ്ഞാണി, ഗണേശമംഗലം പെട്രോള്‍ പമ്പുകള്‍ എന്നിവിടങ്ങളില്‍ പാര്‍ക്ക് ചെയ്തിരുന്ന ബസുകളുടെ മുന്‍ വശത്തെ ചില്ലുകള്‍ തകര്‍ത്ത നിലയില്‍ കണ്ടെത്തുകയായിരുന്നു.
പിന്നീട് അഞ്ചരയോടെ സര്‍വിസ് നടത്തുകയായിരുന്ന കിരണ്‍ ബസിനെ കാഞ്ഞാണിയില്‍ വച്ച് രണ്ടംഗ സംഘം കല്ലെറിഞ്ഞു. സംഭവമറിഞ്ഞ് അന്തിക്കാട് പൊലിസെത്തുകയും ഈ സമയം കൂടുതല്‍ സമരാനുകൂലികള്‍ എത്തുകയുമായിരുന്നു. ഇവരെ പിടിച്ചുമാറ്റാനുള്ള ബലപ്രയോഗത്തിനിടെയാണു പൊലിസുകാര്‍ക്ക് പരുക്കേറ്റത്. ഇതിനിടെ കല്ലെറിഞ്ഞവര്‍ രക്ഷപ്പെട്ടിരുന്നു.
പൊലിസിനെ ആക്രമിച്ച സംഭവത്തില്‍ 12 പേരെ അന്തിക്കാട് പൊലിസ് അറസ്റ്റ് ചെയ്തു. ബസ് ആക്രമിച്ചവരും പൊലിസിനെ ആക്രമിച്ചവരും അറസ്റ്റിലായെന്ന വാര്‍ത്ത പുറത്തായതോടെ ആശങ്കയാല്‍ സംശയിച്ച് നിന്ന മറ്റ് ബസ് ജീവനക്കാരും ബസുകളുമായി നിരത്തിലിറങ്ങിയതോടെ ബി.എം.എസ് ആഹ്വാനം ചെയ്ത സമരം സമ്പൂര്‍ണ പരാജയമായി മാറി. സമരാനുകൂലികളായ റെജി, വിനീത്, സിജു, സുജിത്ത്, രഞ്ജിത്ത്, സുജിത്ത്, ജിജിന്‍ എന്നിവരെ കോടതിയില്‍ ഹാജരാക്കി. പൊലിസിന്റെ കൃത്യനിര്‍വഹണം തടസപ്പെടുത്തുക, ബസിനു കല്ലെറിയല്‍ എന്നീ കേസുകളാണു ഇവര്‍ക്കെതിരേ എടുത്തിട്ടുള്ളത്. കഴിഞ്ഞ തിങ്കളാഴ്ച അരിമ്പൂരില്‍ ശ്രീരാം ബസ് തടഞ്ഞുനിര്‍ത്തി ജീവനക്കാരെ മര്‍ദിച്ച കേസിലെ പ്രതികളെ അറസ്റ്റ് ചെയ്യാത്തതില്‍ പ്രതിഷേധിച്ചാണു  ബി.എം.എസ് പണിമുടക്ക് പ്രഖ്യാപിച്ചത്. അതേസമയം ഈ സംഭവത്തില്‍ മൂന്ന് പേരെ ഇന്നലെ അന്തിക്കാട് പൊലിസ് അറസ്റ്റ് ചെയ്തു. അരിമ്പൂര്‍ നാലാംകല്ല് വിയ്യോക്കാരന്‍ സജീവന്‍ (കണ്ണന്‍41), വെളിയത്ത് അജീഷ് (36), കുന്നത്തങ്ങാടി താണിക്കല്‍ ജസ്റ്റിന്‍ (42)എന്നിവരാണ് അറസ്റ്റിലായത്. ഇവരെ ജാമ്യത്തില്‍ വിട്ടു.