തിരുവനന്തപുരം: ബജറ്റ് ചോര്‍ന്നെന്ന ആരോപണവുമായി സഭ ബഹിഷ്‌കരിച്ച പ്രതിപക്ഷം പ്രതിപക്ഷ നേതാവിന്റെ നേതൃത്വത്തില്‍ മീഡിയാ റൂമില്‍ ബദല്‍ ബജറ്റ് അവതരിപ്പിച്ചു.
ബജറ്റ് അവതരണം രണ്ടേകാല്‍ മണിക്കൂര്‍ പിന്നിട്ടതോടെയാണ് ബജറ്റ് ചോര്‍ന്നതായ ആരോപണവുമായി പ്രതിപക്ഷം രംഗത്തെത്തിയത്. സഭയില്‍ നിന്നു വാക്കൗട്ട് നടത്തി പ്രതിപക്ഷ നേതാവ് രമേശ് ചെന്നിത്തലയാണ് എം.എല്‍.എമാരുമായെത്തി മീഡിയാ റൂമില്‍ സമാന്തര ബജറ്റ് അവതരണം നടത്തിയത്. അവതരണം സുഗമമായി നടക്കുന്നതിനിടെ 11.15ഓടെയാണ് ബജറ്റ് ചോര്‍ന്നെന്ന ആരോപണവുമായി പ്രതിപക്ഷ നേതാവ് രംഗത്തെത്തിയത്.
പിന്നീട് ധനമന്ത്രി തോമസ് ഐസക് ബജറ്റ് അവതരണം തുടരുന്നതിനിടെ സഭയ്ക്ക് പുറത്തു മീഡിയാ റൂമില്‍ രമേശ് ചെന്നിത്തല ബദല്‍ ബജറ്റ് അവതരണം നടത്തുകയായിരുന്നു. ധനമന്ത്രി സഭയ്ക്കുള്ളില്‍ ബജറ്റിലെ വിവരങ്ങള്‍ പ്രഖ്യാപിക്കുമ്പോള്‍ ചോര്‍ന്ന രേഖകള്‍ ഉയര്‍ത്തിക്കാട്ടി പ്രതിപക്ഷ നേതാവും ഓരോ കാര്യങ്ങളും മാധ്യമങ്ങള്‍ക്ക് മുന്നില്‍ അക്കമിട്ടു നിരത്തി ബദല്‍ ബജറ്റ് അവതരിപ്പിച്ചു.
ബജറ്റ് അവതരണത്തിന് സഹായവുമായി എം.എല്‍.എമാരായ പി.ടി തോമസ്, വി.ഡി സതീശന്‍, ഡോ. എം.കെ മുനീര്‍, അനൂപ് ജേക്കബ് എന്നിവരും ഒപ്പമുണ്ടായിരുന്നു.