തിരുവനന്തപുരം: പൊതുമേഖലാ സ്ഥാപനങ്ങളുടെ മാനേജ്‌മെന്റ് സംവിധാനം ശാസ്ത്രീയമാവണമെന്ന് മുഖ്യമന്ത്രി പിണറായി വിജയന്‍. ഇതിനാവശ്യമായ പരിശീലന പരിപാടികള്‍ വ്യവസായ വകുപ്പ് സംഘടിപ്പിക്കണം.
സി. ഇ. ഒ, എം.ഡി എന്നിവര്‍ക്ക് പുറമെ ദൈനംദിന ചുമതലകള്‍ നിര്‍വഹിക്കാന്‍ മുഴുവന്‍ സമയ ഡയരക്ടറെ നിയോഗിക്കണമെന്നും മുഖ്യമന്ത്രി പറഞ്ഞു. വ്യവസായ വകുപ്പിന്റെ ആഭിമുഖ്യത്തില്‍ പൊതുമേഖലാ സ്ഥാപനങ്ങളുടെ മേധാവിമാര്‍ക്ക് സംഘടിപ്പിച്ച ശില്‍പശാല ഉദ്ഘാടനം ചെയ്യുകയായിരുന്നു മുഖ്യമന്ത്രി.
ജില്ലാ വ്യവസായ കേന്ദ്രങ്ങള്‍ നിക്ഷേപകരെ സഹായിക്കുന്നതിനുള്ള കേന്ദ്രങ്ങളായി മാറണം. പുതിയ നിക്ഷേപകര്‍ക്ക് ഉപദേശങ്ങള്‍ നല്‍കാന്‍ കേന്ദ്രങ്ങള്‍ക്ക് കഴിയണം. കാര്‍ഷിക രംഗവുമായി ബന്ധപ്പെട്ട വ്യവസായങ്ങള്‍ക്ക് കൂടുതല്‍ ശ്രദ്ധ നല്‍കണം. നാളികേര പാര്‍ക്കുകള്‍ സ്ഥാപിക്കുന്നതിനെക്കുറിച്ച് ആലോചിക്കുന്നുണ്ട്. പ്രവാസികള്‍ക്കുള്‍പ്പെടെ സുരക്ഷിതമായി നിക്ഷേപിക്കുന്നതിനുള്ള നടപടികള്‍ക്ക് സര്‍ക്കാര്‍ തുടക്കം കുറിച്ചിട്ടുണ്ടെന്നും സുസ്ഥിര വികസന സൂചികയില്‍ കേരളം ഒന്നാമതെത്തുന്നതിന് നിര്‍ണായകമായത് വ്യവസായ രംഗത്തെ മികച്ച പ്രകടനമാണെന്നും മുഖ്യമന്ത്രി പറഞ്ഞു. മന്ത്രി ഇ. പി ജയരാജന്‍ അധ്യക്ഷനായി. സംസ്ഥാന ആസൂത്രണ ബോര്‍ഡ് വൈസ് ചെയര്‍മാന്‍ വി. കെ രാമചന്ദ്രന്‍, വ്യവസായ വകുപ്പ് പ്രിന്‍സിപ്പല്‍ സെക്രട്ടറി കെ. ഇളങ്കോവന്‍ എന്നിവര്‍ സംസാരിച്ചു.