കണ്ണൂര്‍: ദേശീയപാതയ്ക്കരികിലെ മദ്യശാലകള്‍ നീക്കാനുള്ള സുപ്രിംകോടതി ഉത്തരവ് മാഹിയില്‍ അട്ടിമറിക്കാന്‍ പുതുച്ചേരി സര്‍ക്കാരിന്റെ നീക്കം. കേന്ദ്രഭരണ പ്രദേശമായ മാഹിയില്‍ ആകെ പ്രവര്‍ത്തിക്കുന്ന 62 മദ്യശാലകളില്‍ 32 എണ്ണം കണ്ണൂര്‍-കോഴിക്കോട് ദേശീയപാതയോരത്താണുള്ളത്. നിലവില്‍ മാര്‍ച്ച് 31നു ലൈസന്‍സ് കാലാവധി അവസാനിക്കുന്ന സര്‍ക്കാര്‍ നിയന്ത്രണത്തിലുള്ള മദ്യശാലകളടക്കം മാറ്റാന്‍ കേരളത്തിലടക്കം സര്‍ക്കാര്‍ ശ്രമം തുടങ്ങിയപ്പോള്‍ മാഹിയില്‍ അടുത്ത സാമ്പത്തിക വര്‍ഷത്തെ ലൈസന്‍സ് ഫീസ് ഇനത്തില്‍ സര്‍ക്കാര്‍ 6.60 കോടി രൂപ മദ്യവ്യാപാരികളില്‍ നിന്നു കൈപ്പറ്റിക്കഴിഞ്ഞു.

സുപ്രിംകോടതി ഉത്തരവ് പ്രാബല്യത്തില്‍ വരാന്‍ ഒരുമാസം മാത്രം ബാക്കിനില്‍ക്കെ മാഹിയിലെ മുഴുവന്‍ മദ്യശാലകളുടെയും ലൈസന്‍സ് പുതുക്കി നല്‍കാനാണു അടുത്ത സാമ്പത്തിക വര്‍ഷത്തെ എക്‌സൈസ് തീരുവ മദ്യവ്യാപാരികളില്‍ നിന്നു കൈപ്പറ്റിയതെന്നു ആരോപണമുയര്‍ന്നു. പുതുച്ചേരിയിലെ എക്‌സൈസ് ആസ്ഥാനത്തു നിന്നു ലഭിച്ച നിര്‍ദേശത്തെ തുടര്‍ന്നാണ് എക്‌സൈസ് തീരുവ കൈപ്പറ്റിയതെന്നാണു വിവരം. മദ്യ മൊത്ത വില്‍പന കേന്ദ്രങ്ങള്‍ക്കു 22 ലക്ഷം രൂപയും ചില്ലറ വില്‍പന കേന്ദ്രങ്ങള്‍ക്കു 10 ലക്ഷം രൂപയുമായാണ് അടുത്ത സാമ്പത്തിക വര്‍ഷത്തേക്കു പുതുച്ചേരി എക്‌സൈസ് വകുപ്പ് ഈടാക്കിയത്.

ഇതോടെ സുപ്രിംകോടതി ഉത്തരവ് പ്രാബല്യത്തില്‍ വരുന്ന ഏപ്രില്‍ ഒന്നുമുതല്‍ മാഹിയിലെ ദേശീയപാതയോരത്തെ മദ്യശാലകള്‍ സര്‍ക്കാരിന്റെ പിന്തുണയോടെ പ്രവൃത്തിക്കും. കോടതി ഉത്തരവ് നടപ്പാക്കാന്‍ സര്‍ക്കാര്‍ തീരുമാനിച്ചാല്‍ സര്‍ക്കാരിനെതിരേ കോടതിയെ സമീപിച്ച് മദ്യവ്യാപാരികള്‍ക്ക് അനുകൂല വിധിയും നേടാനാകും. എക്‌സൈസ് തീരുവ കൈപ്പറ്റിയ സാഹചര്യത്തില്‍ മാഹിയിലെ ദേശീയപാതയോരത്തെ മദ്യശാലകള്‍ പ്രവൃത്തിക്കേണ്ടതു പുതുച്ചേരി സര്‍ക്കാരിന്റെ കൂടി ബാധ്യതയായി മാറും.