എരുമപ്പെട്ടി: കടങ്ങോട് മേഖലയിലെ അനധികൃത കരിങ്കല്‍ ക്വാറികളില്‍ നിന്നും കല്ല് കയറ്റിവന്നിരുന്ന ടിപ്പര്‍ ലോറികള്‍ നാട്ടുകാര്‍ തടഞ്ഞു. സ്ഥലത്തെത്തിയ പൊലിസ് ആറ് ടിപ്പര്‍ ലോറികള്‍ കസ്റ്റഡിയിലെടുത്തു. മയിലാടുംകുന്ന്, മല്ലന്‍ കുഴി പ്രദേശങ്ങളിലെ ക്വാറികളില്‍ നിന്നും കല്ല് കയറ്റി വന്നിരുന്ന ടിപ്പര്‍ ലോറികളാണ് സ്ത്രീകളും കുട്ടികളും അടങ്ങുന്ന നാട്ടുകാര്‍ തടഞ്ഞത്.
ടിപ്പര്‍ ലോറികളുടെ അമിത സഞ്ചാരം നാട്ടുകാരെ പൊറുതിമുട്ടിച്ചിരിക്കുകയാണ്. പുലര്‍ച്ചയെ അഞ്ചുമണിമുതല്‍ കരിങ്കല്ലും മണ്ണും കയറ്റിയുള്ള ലോറികളുടെ മരണപ്പാച്ചില്‍ ആരംഭിക്കും. രൂക്ഷമായ പൊടിശല്യമാണ് മേഖലയില്‍ അനുഭവപ്പെടുന്നത്. അലര്‍ജി, ആസ്മ തുടങ്ങിയ ശ്വാസതടസ രോഗങ്ങളും അലര്‍ജിരോഗങ്ങളും പിടിപെട്ട് കുട്ടികളും വയോധികരും ഉള്‍പ്പടെയുള്ളവര്‍ ദുരിതമനുഭവിക്കുകയാണ്. പുലര്‍ച്ചെയുള്ള ടിപ്പറുകളുടെ അമിത വേഗത്തിലുള്ള സഞ്ചാരം മദ്‌റസ വിദ്യാര്‍ഥികള്‍ക്കാണ് ഏറെ ഭീഷണിയാകുന്നത് .
ടോറസ് ടിപ്പറുകള്‍ കടന്നുപോകുമ്പോള്‍ വീടുകള്‍ക്ക് കുലുക്കം അനുഭവപ്പെടുന്നതായും നാട്ടുകാര്‍ പറയുന്നു. നിരവധി തവണ പരാതിപ്പെട്ടിട്ടും അധികൃതര്‍ നടപടി സ്വീകരിക്കുന്നില്ലെന്ന് നാട്ടുകാര്‍ ആരോപിച്ചു.
ഇന്നലെ പുലര്‍ച്ചെ ആറുമണിയോടെയാണ് കടങ്ങോട് പള്ളിമേപ്പുറത്ത് പ്രദേശവാസികള്‍ ടിപ്പര്‍ ലോറികള്‍ തടഞ്ഞത്.
നാട്ടുകാര്‍ വിവരമറിയിച്ചതിനെ തുടര്‍ന്ന് എരുമപ്പെട്ടി എസ്.ഐ സുബിന്തിന്റെ നേതൃത്വത്തിലുള്ള പൊലിസ് സ്ഥലത്തെത്തി ലോറികള്‍ കസ്റ്റഡിയിലെടുത്തു. മേഖലയില്‍ അനധികൃതമായി കുന്നിടിച്ച് വന്‍തോതില്‍ മണ്ണെടുപ്പ് നടത്തുന്നതായും നാട്ടുകാര്‍ പറഞ്ഞു.