മട്ടന്നൂര്‍: ഒരു മാസം മുന്‍പ് മട്ടന്നൂര്‍ മരുതായിയില്‍  യുവാവിനെ കുത്തിപരുക്കേല്‍പ്പിച്ച് ലക്ഷങ്ങള്‍ തട്ടിയ സംഭവത്തില്‍ നടുവനാട് സ്വദേശിയും ഡി.വൈ.എഫ്.ഐ നേതാവുമായ പി.പി മനോജിനെ(39) പൊലിസ് അറസ്റ്റ് ചെയ്തു. ഇന്നലെ രാവിലെ ആറോടെ നടുവനാട് എല്‍.പി സ്‌കൂളിന് സമിപം മട്ടന്നൂര്‍ സി.ഐ ഷജു ജോസഫും സംഘവും ചേര്‍ന്നാണ് അറസ്റ്റു ചെയ്തത്. കേസിലെ മുഖ്യ സൂത്രധാരന്‍ ഉള്‍പ്പെടെ രണ്ട് പേരെ കഴിഞ്ഞ ദിവസം മട്ടന്നൂര്‍ പൊലിസ്  അറസ്റ്റ് ചെയ്തിരുന്നു. ഇവരില്‍ നിന്ന് ലഭിച്ച വിവരത്തിന്റ അടിസ്ഥാനത്തിലാണ് മനോജിനെ പിടികൂടിയത്. പണം തട്ടിപ്പറിക്കാന്‍ ആസൂത്രണം നടത്തിയതിനും കുറ്റകൃത്യങ്ങള്‍ ചെയ്യാന്‍ മറ്റുള്ളവരെ പ്രേരിപ്പിച്ചതിനുമാണ് മനോജിനെതിരേ കേസെടുത്തിരിക്കുന്നത്. എട്ടാം പ്രതിയായാണ് മനോജിനെ പ്രതി ചേര്‍ത്തത്.
കഴിഞ്ഞ മാസം ഒന്നാം തിയതി ഉച്ചകഴിഞ്ഞ് മൂന്നരയോടെ മട്ടന്നൂര്‍-ഇരിക്കൂര്‍ റൂട്ടില്‍ മരുതായി കള്ള്ഷാപ്പിന് സമീപത്ത് വച്ചായിരുന്നു യുവാവിനെ കുത്തിപരുക്കേല്‍പ്പിച്ച് ആറു ലക്ഷത്തോളം രൂപ തട്ടിയത്. പണയത്തിലിരിക്കുന്ന സ്വര്‍ണാഭരണം എടുത്ത് നല്‍കുന്ന സംഘത്തില്‍പ്പെട്ട ഷമീറിനെയും സുഹൃത്ത് കോഴിക്കോട് മുരിങ്ങലിലെ മിഖ്ദാദിനെയും സംഘം മട്ടന്നൂരിലേക്ക് വിളിച്ചുവരുത്തുകയായിരുന്നു.