കൊടുങ്ങല്ലൂര്‍: അഴീക്കോട്ട് നിന്നും ലൈസന്‍സും രജിസ്‌ട്രേഷനുമില്ലാത്ത മത്സ്യബന്ധന ബോട്ട് പിടികൂടി. ബോട്ടില്‍ നിന്നും ഭക്ഷ്യയോഗ്യമല്ലാത്ത വലുപ്പത്തില്‍ കുറവുള്ള 15 ടണ്‍ ക്ലാത്തി ഇനത്തില്‍പെട്ട മത്സ്യവും പിടിച്ചെടുത്തിട്ടുണ്ട്.
ഇത്തരം മത്സ്യം തെക്കന്‍ മേഖലകളില്‍ വളം നിര്‍മാണത്തിന് ഉപയോഗിച്ചുവരുന്നതായി ഫിഷറീസ് ഉദ്യോഗസ്ഥര്‍ പറഞ്ഞു. കരുനാഗപ്പള്ളി സ്വദേശി മണലിക്കര ഖര്‍ജിയുടെ ഉടമസ്ഥതയിലുള്ള ഇവാനോ എന്ന ബോട്ടാണ് പിടികൂടിയത്.
ഫിഷറീസ് അസി. ഡയരക്ടര്‍ വി. പ്രശാന്തന്‍, ഫിഷറീസ് സബ് ഇന്‍സ്‌പെക്ടര്‍ അബ്ദുല്‍ ജബാര്‍, സീഗാര്‍ഡുമാരായ അന്‍സാര്‍, ഫസല്‍ എന്നിവരുടെ നേതൃത്വത്തിലാണ് ബോട്ട് പിടികൂടിയത്. കഴിഞ്ഞ ദിവസം അഴീക്കോട്ട് നിന്നും മറ്റൊരു ബോട്ട് ഇത്തരത്തില്‍ പിടികൂടുകയും മൂന്നര ലക്ഷം രൂപ പിഴ ഈടാക്കുകയും ചെയ്തിരുന്നു.