കൊപ്പം: കാറല്‍മണ്ണ എന്‍. എന്‍ യു.പി സ്‌കൂള്‍ പൂര്‍വ വിദ്യാര്‍ഥികള്‍ രൂപം കൊടുത്ത 'ഹസ്ത' എന്ന സംഘടനയുടെ നേതൃത്വത്തില്‍ കൊപ്പം അഭയം അന്തേവാസികള്‍ക്ക് വിനോദയാത്ര സംഘടിപ്പിച്ചു. ആശ്രിതരില്ലാത്തവരും ഭിന്നശേഷിക്കാരുമായ അന്തേവാസികളാണ് അഭയത്തിലുള്ളത്. മലമ്പുഴ ഫാന്റസി പാര്‍ക്കും കോയമ്പത്തൂര്‍ ഈശ സെന്ററും അഭയവാസികള്‍ സന്ദര്‍ശിച്ചു. അഭയത്തിലെ 17 പേരോടൊപ്പം ഒറ്റപ്പാലം സുഹൃത് ഭവനിലെ 30 കുട്ടികളും സംഘത്തിലുണ്ടായിരുന്നു.
കാറിലും, ഡ്രാഗണിലും മറ്റും തിരിയാനും ഊഞ്ഞാലാട്ടാനും ഭക്ഷണം നല്‍കാനും പാട്ടും ഡാന്‍സും സിനിമയും കാണിക്കാനും ഹസ്തയുടെ പ്രവര്‍ത്തകര്‍ അഭയവാസികളെ ശ്രദ്ധിക്കുവാനും അവരെ സഹായിക്കുവാനും മുന്നിലുണ്ടായിരുന്നു. ആദ്യമായാണ് ഇത്തരം ഒരു യാത്ര അഭയത്തിന് ലഭിക്കുന്നതെന്ന് അഭയം ചെയര്‍മാന്‍ കൃഷ്ണന്‍ പറഞ്ഞു. ഹസ്തയെ പ്രതിനിധീകരിച്ച് ഭാരവാഹികളായ അനുശ്രീ, കാര്‍ത്തിക്, സൂരജ്, വിഷ്ണുദാസ്, സുബീഷ്, നീതു, വൃന്ദ തുടങ്ങിയവര്‍ നേതൃത്വം നല്‍കി.