കൂറ്റനാട്: മേഴത്തൂരില്‍ നിയന്ത്രണംവിട്ട ജീപ്പിടിച്ച് ബൈക്ക് യാത്രികര്‍ക്ക് പരുക്കേറ്റു. തൃത്താല പ്രാഥമികാരോഗ്യകേന്ദ്രത്തിലെ ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ റോബിന്‍സണ്‍, പ്രമോദ് എന്നിവര്‍ക്കാണ് പരുക്കേറ്റത്. ഇവരെ ആദ്യം കൂറ്റനാട്ടെയും പിന്നീട് തൃശ്ശൂരിലെയും സ്വകാര്യ ആശുപത്രികളില്‍ പ്രവേശിപ്പിച്ചു. പ്രമോദിന്റെ കാലിന് ഒടിവുണ്ട്. മേഴത്തൂര്‍ സെന്ററില്‍ ഞായറാഴ്ച ഉച്ചയ്ക്ക് രണ്ടുമണിയോടെയായിരുന്നു അപകടം. നിയന്ത്രണംവിട്ട ജീപ്പ് സെന്ററിലെ ലേട്ടറിക്കടയിലേക്ക് ഇടിച്ചുകയറിയാണ് നിന്നത്.
കൂറ്റനാട് ഭാഗത്തുനിന്ന് തൃത്താല ഭാഗത്തേക്ക് അമിതവേഗത്തില്‍ വരികയായിരുന്ന വാഹനം മറ്റൊരു വാഹനത്തെ മറികടക്കാന്‍ ശ്രമിക്കുന്നതിനിടെ എതിരേവന്ന ബൈക്കില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ബൈക്ക് യാത്രികര്‍ റോഡിലേക്ക് തെറിച്ചുവീണു. കടയിലെ ചുവരിന്റെ ഒരു ഭാഗവും രണ്ട് തൂണുകളും ഷട്ടറും തകര്‍ന്നു. സമീപത്തെ ആളുകള്‍ ഓടിമാറിയതിനാല്‍ വന്‍ദുരന്തം ഒഴിവായി.
അപകടത്തില്‍ ഒരു ജീപ്പ് യാത്രക്കാരനും പരുക്കേറ്റു. വാഹനത്തില്‍നിന്ന് പൊലിസ് മദ്യക്കുപ്പികള്‍ കണ്ടെടുത്തു. ജീപ്പ് ഡ്രൈവര്‍ മദ്യപിച്ചിരുന്നതായി നാട്ടുകാര്‍ പറഞ്ഞു. ഇയാള്‍ അപകടത്തെത്തുടര്‍ന്ന് ഓടിരക്ഷപ്പെടുകയും ചെയ്തു. തൃത്താല പൊലിസ് സ്ഥലത്തെത്തി മേല്‍നടപടി സ്വീകരിച്ചു.