പട്ടാമ്പി: ട്രായ് പ്രഖ്യാപിച്ച പുതിയ പരിഷ്‌ക്കരണങ്ങള്‍ക്കെതിരെ രാജ്യത്തുടനീളമുള്ള കേബിള്‍ ഓപ്പറേറ്റര്‍മാര്‍ സമരത്തിലേക്ക്. ജനുവരി 24ന് 24 മണിക്കൂര്‍ നേരം സിഗ്‌നല്‍ ഓഫ് ചെയ്തുകൊണ്ട് ചാനല്‍ ബ്ലാക്ക് ഔട്ട് നടത്തി പ്രതിഷേധിക്കുമെന്നും സമരവുമായി ഉപഭോക്താക്കള്‍ സഹകരിക്കണമെന്നും മീഡിയ ആന്‍ഡ് കേബിള്‍ ഓപ്പറേറ്റേഴ്‌സ് അസോസിയേഷന്‍ സംസ്ഥാന-ജില്ലാ ഭാരവാഹികള്‍ അറിയിച്ചു.
കേബിള്‍ ടി.വി, ഡി.ടി.എച്ച്, ഐ.പി.ടി.വി മേഖല ഒന്നടങ്കം, രാജ്യത്തെ കുത്തക കമ്പനികള്‍ക്ക് തീറെഴുതുന്നതിനുവേണ്ടിയാണ് ട്രായ്‌യുടെ പുതിയ പരിഷ്‌കരണ നയങ്ങള്‍ ഫെബ്രുവരി 1 മുതല്‍ നടപ്പിലാക്കുന്നത്.
നിലവില്‍ 200, 250, 300 രൂപക്ക് എച്ച്.ഡി അടക്കം ഉപഭോക്താക്കള്‍ക്കാവശ്യമായ എല്ലാ ചാനലുകളും ഇപ്പോള്‍ ലഭിക്കുന്നുണ്ട്. ട്രായ്‌യുടെ പുതിയ നയം നടപ്പിലാവുമ്പോള്‍ മലയാളത്തിലെ ഫ്രീ-ടൂ എയര്‍ ചാനലുകളും (വിവിധ വിനോദ ചാനലുകള്‍) ലഭിക്കാന്‍ ഉപഭോക്താവ് ഇതുവരെ നല്‍കിയിരുന്ന തുകയേക്കാള്‍ കൂടുതല്‍ നല്‍കേണ്ടി വരും. കൂടാതെ 18 ശതമാനം ജി.എസ്.ടി കൂടി നല്‍കണം. ഇതിന് പുറമേ ഇപ്പോഴത്തെ ഫ്രീ ടു എയര്‍ ചാനലുകള്‍ പേ ചാനലുകളായതിനാല്‍ അതിന് പ്രത്യേക തുകയും നല്‍കേണ്ടി വരും.
കഴിഞ്ഞ 25 വര്‍ഷത്തോളം പ്രേക്ഷകര്‍ക്കിഷ്ടപ്പെട്ട ചാനലുകള്‍ ഹര്‍ത്താലൊ, പ്രതികൂല കാലാവസ്ഥകളൊ, ലാഭമോ, നഷ്ടമോ നോക്കാതെ തുച്ഛമായ തുകക്ക് ഉപഭോക്താവിന്റെ സ്വീകരണമുറിയില്‍ എത്തിച്ചു തരുന്ന ലക്ഷക്കണക്കിന് ഓപ്പറേറ്റര്‍മാരുടെയും, അവരുടെ കീഴില്‍ ജോലി ചെയ്യുന്ന ലക്ഷക്കണക്കിന് തൊഴിലാളികളുടെയും തൊഴില്‍ സംരക്ഷിക്കുകയും, പേ ചാനലുകളുടെ ഭീമമായ എം.ആര്‍.പി നിരക്ക് കുറയ്ക്കുകയും, ജി.എസ്.ടി 18 ശതമാനം എന്നത് ഇളവ് നല്‍കുകയും, പേ ചാനല്‍ വിതരണ കമ്മിഷന്‍ അനുപാതം പുനഃപരിശോധിക്കുകയും വേണമെന്നാണ് ഇന്ത്യയൊട്ടാകെയുള്ള കേബിള്‍ ഓപ്പറേറ്റര്‍മാര്‍ ആവശ്യപ്പെടുന്നതെന്ന് ഭാരവാഹികള്‍ പറഞ്ഞു.
ജനുവരി 24ന് സിഗ്‌നല്‍ ഓഫ് ചെയ്ത് ചാനല്‍ ഹര്‍ത്താല്‍ നടത്തുന്നതിന്റെ മുന്നോടിയായി 23ന് ബുധനാഴ്ച വൈകുന്നേരംഅഞ്ചിന് പട്ടാമ്പിയില്‍ കേബിള്‍ ഓപ്പറേറ്റര്‍മാരും തൊഴിലാളികളും കുടുംബാംഗങ്ങളും പ്രകടനം നടത്തുമെന്ന് എം.സി.ഒ.എ സംസ്ഥാന സമിതി അംഗം എന്‍. മുരളീധരന്‍, ജില്ലാ സെക്രട്ടറി എസ്.എന്‍ ജീവന്‍, മേഖലാ സമിതി അംഗങ്ങളായ കെ. ഉണ്ണികൃഷ്ണന്‍, എം.സുരേഷ് എന്നിവര്‍ അറിയിച്ചു.