ഹൂസ്റ്റണ്‍: നിങ്ങള്‍ക്ക് എന്തു ആവശ്യമുണ്ടെങ്കിലും ഇന്ത്യന്‍ ജനത കൂടെയുണ്ടാകും. ഹൈദരാബാദ് സ്വദേശിയായ ശ്രീനിവാസ് കുച്ചിബോട്്‌ല (32) നെ അക്രമി വെടിവയ്ക്കുന്നത് തടയവേ വെടിയേറ്റ് പരുക്കേറ്റ ഗ്രില്ലോട്ടിനോടാണ് ഈ ആശ്വാസ വാക്കുകള്‍. വിദേശകാര്യ മന്ത്രി സുഷമാ സ്വരാജാണ് ഇന്ത്യന്‍ ജനതയുടെ പിന്തുണ ഗ്രില്ലോട്ടിനെ അറിയിച്ചത്.
എന്റെ രാജ്യത്തു നിന്ന് പുറത്തുപോകൂ തീവ്രവാദി എന്ന് ആക്രോശിച്ച് ഇന്ത്യന്‍ എന്‍ജിനീയറായ ശ്രീനിവാസനെ മുന്‍ യു.എസ് നാവിക സേനാംഗം വെടിവച്ചു കൊലപ്പെടുത്തിയിരുന്നു.
ഹൂസ്റ്റണിലെ ഇന്ത്യന്‍ സ്ഥാനപതി അനുപം റായ് ഗ്രില്ലോട്ടിനെയും അദ്ദേഹത്തിന്റെ കുടുംബത്തെയും സന്ദര്‍ശിച്ചിരുന്നു. കന്‍സാസ് യൂനിവേഴ്‌സിറ്റി ആശുപത്രിയിലാണ് ഇദ്ദേഹം ചികിത്സയില്‍ കഴിയുന്നത്.
വംശീയവാദിയായ അക്രമിയെ കടുത്തഭാഷയില്‍ എതിര്‍ത്താണ് വെടിവയ്പ് ഗ്രില്ലോട്ട് തടയാന്‍ ശ്രമിച്ചത്. ഗ്രില്ലോട്ടിനെയും കുടുംബത്തെയും ഇന്ത്യയിലേക്ക് ക്ഷണിച്ചിട്ടുണ്ട്. തനിക്ക് നല്‍കിയ പിന്തുണയോട് അദ്ദേഹം നന്ദി അറിയിച്ചു.