ന്യൂഡല്‍ഹി: ശബരിമലയില്‍ എല്ലാ പ്രായത്തിലുമുള്ള സ്ത്രീകള്‍ക്കും പ്രവേശനം അനുവദിച്ചുള്ള ഭരണഘടനാ ബെഞ്ചിന്റെ ഉത്തരവ് പുനപ്പരിശോധിക്കണമെന്നാവശ്യപ്പെട്ടുള്ള ഹരജികള്‍ എന്നു പരിഗണിക്കുമെന്ന കാര്യത്തില്‍ അനിശ്ചിതത്വം.
ഇന്നലെയാണ് കേസ് പരിഗണിക്കാന്‍ തീരുമാനിച്ചിരുന്നതെങ്കിലും അഞ്ചംഗ ഭരണഘടനാബെഞ്ചിലെ ഏക വനിതാ ജഡ്ജി ജസ്റ്റിസ് ഇന്ദു മല്‍ഹോത്ര അവധിയില്‍ പ്രവേശിച്ചതോടെയാണ് കേസ് നീണ്ടുപോയത്. ഇന്നലെ പുനപ്പരിശോധനാഹരജികള്‍ സംബന്ധിച്ച് ചീഫ്ജസ്റ്റിസ് മുന്‍പാകെ ഹരജിക്കാരിലൊരാളുടെ അഭിഭാഷകന്‍ മാത്യൂ നെടുമ്പാറ സൂചിപ്പിച്ചെങ്കിലും തിയതി തീരുമാനിക്കാനായിട്ടില്ലെന്നായിരുന്നു മറുപടി.
ജസ്റ്റിസ് ഇന്ദു മല്‍ഹോത്ര അവധി കഴിഞ്ഞു വന്നശേഷമെ തിയതി നിശ്ചയിക്കൂവെന്നും ചീഫ്ജസ്റ്റിസ് രഞ്ജന്‍ ഗൊഗോയ് അറിയിച്ചു.
ഇന്ദു മല്‍ഹോത്ര ജനുവരി 30 വരെ അവധിയിലാണ്.
കേസ് അടുത്തമാസം എട്ടിനു പരിഗണിക്കാന്‍ നിശ്ചയിച്ചതായി സുപ്രിംകോടതിയുടെ വെബ്‌സൈറ്റില്‍ രേഖപ്പെടുത്തിയിട്ടുണ്ട്. തിയതി നിശ്ചയിച്ചിട്ടുണ്ടെങ്കിലും എട്ടിനു പരിഗണിക്കുന്ന കാര്യത്തിലും സുപ്രിംകോടതിയില്‍നിന്ന് ഒരു ഉറപ്പും ഉണ്ടായിട്ടില്ല. അന്‍പതോളം പുനപ്പരിശോധനാ ഹരജികളും നാലു റിട്ട് ഹരജികളുമാണ് പരിഗണനയിലുള്ളത്.