ലഖ്നൗ: തകര്‍ക്കപ്പെട്ട ബാബരി മസ്ജിദിനു പകരമായി അയോധ്യയില്‍ സുപ്രിം കോടതി വാഗ്ദാനം ചെയ്ത അഞ്ചേക്കര്‍ ഭൂമി സ്വീകരിക്കുന്നതായി ഒടുവില്‍ സുന്നി വഖഫ് ബോര്‍ഡ് അറിയിച്ചു. സുപ്രീം കോടതി വിധിയെ ചോദ്യം ചെയ്ത് വിവിധവ്യക്തികളും സംഘടനകളും ഹരജി സമര്‍പ്പിച്ചെങ്കിലും സുപ്രിംകോടതി തള്ളിക്കളയുകയായിരുന്നു. ഈ പശ്ചാത്തലത്തില്‍ കൂടിയാണ് സുന്നി വഖഫ് ബോര്‍ഡിന്റെ പുതിയ തീരുമാനം.

പള്ളി പണിയാനുള്ള ഭൂമിയാണ് സ്വീകരിച്ചത്. സുപ്രിം കോടതിയുടെ നിര്‍ദ്ദേശം അനുസരിക്കുന്നുവെന്നാണ് സുന്നി ബോര്‍ഡ് വ്യക്തമാക്കുന്നത്. സുപ്രിം കോടതിയുടെ നിര്‍ദേശം സ്വീകാര്യമല്ലെന്നായിരുന്നു നേരത്തെ മുസ്ലിം വ്യക്തിനിയമ ബോര്‍ഡ് നിലപാട് വ്യക്തമാക്കിയിരുന്നത്. 2.77 ഏക്കര്‍ തര്‍ക്കഭൂമിയില്‍ ക്ഷേത്രം പണിയാന്‍ നല്‍കിയതിന് പകരമായി സ്ഥലം വേണ്ടെന്നും മുസ്ലിം വ്യക്തിനിയമ ബോര്‍ഡ് അറിയിച്ചിരുന്നു.
സുപ്രിം കോടതി വിധിയില്‍ നീതി ലഭിച്ചില്ലെന്നായിരുന്നു മുസ്ലിം വ്യക്തിനിയമ ബോര്‍ഡിന്റെയും മുസ്‌ലിം നേതാക്കളുടെയും അഭിപ്രായം. പള്ളിയില്‍ വിഗ്രഹം പ്രതിഷ്ഠിച്ചതും, പള്ളി തകര്‍ത്തതും ക്രിമിനല്‍ കുറ്റമായി സുപ്രിം കോടതി കണ്ടു. എന്നാല്‍ അതിനോട് നീതിപുലര്‍ത്തുന്നതായിരുന്നില്ല വിധിയെന്നും വിയോജിപ്പുകളുള്ളവര്‍ വിലയിരുത്തിയിരുന്നു. മൂന്ന് മാസത്തിനുള്ളില്‍ പള്ളിക്കായി അഞ്ചേക്കര്‍ ഭൂമി കണ്ടെത്തി നല്‍കണമെന്നായിരുന്നു കോടതി വിധി. ഇതനുസരിച്ച് ബാബ്‌റി മസ്ജിദിന് പകരം പള്ളി പണിയാന്‍ അഞ്ചേക്കര്‍ ഭൂമി കണ്ടെത്തി യു.പി സര്‍ക്കാര്‍ നേരത്തെ വിജ്ഞാപനം പുറപ്പെടുവിച്ചത്.

1992 ഡിസംബര്‍ ആറിനാണ് ബാബ്‌രി മസ്ജിദ് കര്‍സേവകര്‍ തകര്‍ത്തത്. ഇതേചൊല്ലി നീണ്ട നിയമയുദ്ധത്തിന് 2019 നവംബര്‍ ഒമ്പതിനാണ് സുപ്രീം കോടതി വിധി പറഞ്ഞത്.
പള്ളി പൊളിച്ചുനീക്കിയ സ്ഥലത്ത് ക്ഷേത്രം നിര്‍മിക്കാമെന്നും മുസ്ലീങ്ങള്‍ക്ക് പള്ളി നിര്‍മിക്കാനായി അയോധ്യയില്‍ അഞ്ച് ഏക്കര്‍ സംസ്ഥാന സര്‍ക്കാര്‍ ഭൂമി നല്‍കണമെന്നുമുള്ള വിധിയിലാണ് സുന്നി വഖ്ഫ് ബോര്‍ഡിന്റെ തീരുമാനം.