കൊല്ലം: ആലപ്പാട്ടെ കരിമണല്‍ ഖനനത്തിനെതിരായ സമരത്തിനെതിരേ സംയുക്ത ട്രേഡ് യൂനിയന്‍ രംഗത്ത്.
പൊതുമേഖലാ സ്ഥാപനങ്ങളായ ഐ.ആര്‍.ഇ, കെ.എം.എം.എല്‍ എന്നിവയുടെ നാശത്തിനാണ് സമരം ഇടയാക്കുകയെന്ന് സംയുക്ത ട്രേഡ് യൂനിയന്‍ നേതാവും ആര്‍.എസ്.പി കേന്ദ്ര സെക്രട്ടേറിയറ്റംഗവുമായ ഷിബു ബേബി ജോണ്‍ വാര്‍ത്താസമ്മേളനത്തില്‍ പറഞ്ഞു.
ഖനനം മൂലം ആലപ്പാട്ടെ ഭൂപ്രദേശം ഇല്ലാതാകുമെന്നതിന് അടിസ്ഥാനമില്ല. സീവാഷിങ് സര്‍ക്കാര്‍ നിര്‍ത്തിവച്ചതുമൂലം കെ.എം.എം.എല്ലിന്റെ പ്രവര്‍ത്തനം ഇല്ലാതാകും. സീവാഷിങ്ങിലൂടെ ലഭിക്കുന്ന കരിമണലാണ് കെ.എം.എം.എല്ലിന്റെ പ്രവര്‍ത്തനത്തിന് ഉപയോഗിക്കുന്നത്. ഖനനപ്രദേശത്തുനിന്നുള്ള കരിമണലില്‍നിന്ന് 40 ശതമാനത്തില്‍ താഴയാണ് ഇല്‍മനൈറ്റ് ലഭിക്കുക.
എന്നാല്‍, സീവാഷിങ്ങിലൂടെ 60 ശതമാനം ഇല്‍മനൈറ്റ് കിട്ടും. ഖനന പ്രദേശത്ത് മണല്‍ പുനഃസ്ഥാപിക്കണമെങ്കില്‍ സീവാഷിങ്ങിലൂടെ ലഭിക്കുന്ന വേസ്റ്റ് മണല്‍ വേണ്ടിവരും. സര്‍ക്കാര്‍ സമരസമിതിയുമായി നടത്തിയ ചര്‍ച്ചയില്‍ സംയുക്ത ട്രേഡ് യൂനിയനെ ക്ഷണിച്ചിരുന്നില്ല. സീവാഷിങ് അടിയന്തരമായി പുനരാംരംഭിച്ചില്ലെങ്കില്‍ കെ.എം.എം.എല്‍ അടച്ചുപൂട്ടേണ്ടിവരുമെന്നും അദ്ദേഹം പറഞ്ഞു. സമരത്തിന് സാമ്പത്തിക പിന്തുണ നല്‍കുന്ന ശക്തികളെ സര്‍ക്കാര്‍ കണ്ടെത്തണമെന്ന് സി.ഐ.ടി.യു നേതാവ് എന്‍. പത്മലോചനന്‍ ആവശ്യപ്പെട്ടു.
രാജ്യത്തെ ആയിരത്തില്‍പ്പരം വ്യവസായ സ്ഥാപനങ്ങള്‍ ഐ.ആര്‍.ഇയുടെ കരിമണലിനെ ആശ്രയിച്ചാണ് പ്രവര്‍ത്തിക്കുന്നത്. രാജ്യത്തിന്റെ പ്രതിരോധ, ബഹിരാകാശ വാഹന നിര്‍മാണത്തിന് ആവശ്യമായ ലോഹങ്ങള്‍ ഉല്‍പ്പാദിപ്പിക്കുന്നതും കരിമണലില്‍ നിന്നാണെന്നും അദ്ദേഹം പറഞ്ഞു. ഐ.എന്‍.ടി.യു.സി ദേശീയ സെക്രട്ടറി കെ. സുരേഷ്ബാബു, ബി.എം.എസ് നേതാവ് പരിമണം ശശി എന്നിവരും വാര്‍ത്താസമ്മേളനത്തില്‍ പങ്കെടുത്തു.