കോഴിക്കോട്: ട്രെയിനുകളില്‍ ലക്ഷങ്ങളുടെ സ്വര്‍ണാഭരണം കവര്‍ച്ച ചെയ്ത കേസിലെ അന്വേഷണം കുപ്രസിദ്ധ മോഷ്ടാവ് ലാലാ കബീറിലേക്ക്. കോയമ്പത്തൂര്‍ ജയിലില്‍ കഴിയുന്ന ലാലാ കബീറിനെ കോടതിയുടെ പ്രത്യേക അനുമതിയോടെ റെയില്‍വേ പൊലിസ് ചോദ്യം ചെയ്യും. കോഴിക്കോട് റെയില്‍വേ സി.ഐ സുരേഷ്ബാബുവിന്റെ നേതൃത്വത്തിലുള്ള സംഘമാണ് കോയമ്പത്തൂര്‍ ജയിലിലെത്തി ചോദ്യം ചെയ്യുക. കവര്‍ച്ചയ്ക്കു പിന്നില്‍ ലാലാ കബീറിന്റെ സംഘാംഗങ്ങളാണെന്നാണു പൊലിസ് സംശയിക്കുന്നത്. ഇതുസംബന്ധിച്ച കൂടുതല്‍ വിവരങ്ങള്‍ ലഭ്യമാക്കാനാണ് ജയിലിലെത്തി ഇയാളെ ചോദ്യം ചെയ്യുന്നത്.
ചെന്നൈ, ബംഗളൂരു എന്നിവിടങ്ങളില്‍നിന്ന് കഴിഞ്ഞദിവസം ഹരിയാനയില്‍ നിന്നുള്ള മോഷണസംഘത്തെ പിടികൂടിയിരുന്നു. ലാലാ കബീറിന്റെ കൂട്ടാളികളില്‍ ആര്‍ക്കെങ്കിലും ഈ സംഘവുമായി ബന്ധമുണ്ടോയെന്നും പരിശോധിക്കും. ബംഗളൂരു പൊലിസിന്റെ കസ്റ്റഡിയിലുള്ള ഇവരെ ചോദ്യം ചെയ്യാനും റെയില്‍വേ പൊലിസ് ശ്രമം നടത്തുന്നുണ്ട്. കൂടാതെ ട്രെയിനുകളില്‍ മോഷണം നടത്തുന്നതില്‍ വിദഗ്ധനായ തമിഴ്‌നാട് സ്വദേശി വെണ്ടര്‍ സുരേഷിനെ കേന്ദ്രീകരിച്ചും അന്വേഷണം നടക്കുന്നുണ്ട്. മോഷണം നടത്തി അതിസാഹസികമായി ഓടുന്ന ട്രെയിനുകളിലേക്ക് ചാടിക്കയറി രക്ഷപ്പെടുന്നതാണ് ഇയാളുടെ രീതി. ഇക്കഴിഞ്ഞ ആറിനു ജയില്‍ മോചിതനായ സുരേഷ് ഇപ്പോള്‍ എവിടെയാണുള്ളതെന്ന് പൊലിസിനു വ്യക്തമല്ല. ട്രെയിന്‍ കവര്‍ച്ചാ കേസുകളിലെ പ്രതികളുടെ പട്ടിക കൈമാറാന്‍ തമിഴ്‌നാട് പൊലിസിനോട് നേരത്തെ ആവശ്യപ്പെട്ടിരുന്നു.
ഇക്കഴിഞ്ഞ എട്ടിനു ചെന്നൈ-മംഗളൂരു സൂപ്പര്‍ഫാസ്റ്റ്, തിരുവനന്തപുരം- മംഗളൂരു മലബാര്‍ എക്‌സ്പ്രസുകളിലെ എ.സി കോച്ചുകളിലാണു മോഷണം നടന്നത്. രണ്ട് ട്രെയിനുകളിലെ യാത്രക്കാരില്‍നിന്നായി 15 ലക്ഷം രൂപയുടെ സ്വര്‍ണവും വജ്രവുമാണ് കവര്‍ന്നത്. ചെന്നൈ സ്വദേശിനി പൊന്നിമാരന്‍, കാഞ്ഞങ്ങാട് പുല്ലൂര്‍ ഉദനഗര്‍ നെല്ലിയോടന്‍ വീട്ടില്‍ വൈശാഖ് എന്നിവരുടെ ആഭരണങ്ങളാണു നഷ്ടപ്പെട്ടത്.
സംഭവവുമായി ബന്ധപ്പെട്ട് പാലക്കാട് റെയില്‍വേ ഡിവൈ.എസ്.പിയുടെ നിര്‍ദേശപ്രകാരം സി.ഐ എം.കെ കീര്‍ത്തിബാബു, എസ്.ഐ ജംഷീദ് പുറമ്പാളി എന്നിവര്‍ ചെന്നൈയിലെത്തി അന്വേഷണം നടത്തിയിരുന്നു. കവര്‍ച്ച നടന്ന ട്രെയിനുകളിലെ ജീവനക്കാരുടെയും യാത്രക്കാരുടെയും മൊഴി രേഖപ്പെടുത്തി വരികയാണ്.