നെല്‍വയലുകളും കുളങ്ങളും ജലസംഭരണികളും കുന്നുകളും സംരക്ഷിക്കുകയും വൃത്തിയായി സൂക്ഷിക്കുകയും ചെയ്യേണ്ടത് സര്‍ക്കാരിന്റെ മാത്രം ഉത്തരവാദിത്തമല്ല. ഇത് സമൂഹത്തിന്റെ ഭാവി സുരക്ഷയെ മുന്‍നിര്‍ത്തിയുള്ള ആവശ്യകതയാണെന്ന് മനസിലാക്കിയുള്ള കൂട്ടായ പ്രവര്‍ത്തനമാണ് കാലത്തിന്റെ ആവശ്യം. സാമൂഹികമായ മനോഭാവമാറ്റവും ജീവിത ശൈലിയില്‍ മാറ്റവും ഉണ്ടായാല്‍ മാത്രമേ കേരളത്തില്‍ ദീര്‍ഘകാല അടിസ്ഥാനത്തില്‍ ജല സുരക്ഷാ ഉറപ്പുവരുത്തുവാന്‍ സാധിക്കുകയുള്ളു. ഈ വസ്തുത ഉള്‍കൊണ്ടുകൊണ്ടാണ് സര്‍ക്കാര്‍ സാമൂഹിക സംഘടനകളെക്കുടി ഉള്‍ക്കൊള്ളിച്ചുകൊണ്ട് വരള്‍ച്ചാ പ്രതിരോധ പ്രവര്‍ത്തനങ്ങള്‍ നടത്താന്‍ നിര്‍ദേശിച്ചിരിക്കുന്നതും അതോടനുബന്ധിച്ച് ഹരിത കേരളം പദ്ധതിയില്‍ ജല-പരിസ്ഥിതി സംരക്ഷണം ഊന്നിയുള്ള അവബോധ പ്രവര്‍ത്തനങ്ങള്‍ ഉണ്ടാകും എന്ന് തീരുമാനിച്ചിട്ടുള്ളതും. വ്യത്യസ്ത പദ്ധതികളോടൊപ്പം ജലസ്രോതസുകള്‍ പരിപോഷിപ്പിക്കുവാന്‍ ജലവാര്‍ഷിണി, മഴപ്പൊലിമ എന്നീ പദ്ധതികളും ദുരന്തനിവാരണ അതോറിറ്റി നടത്തിവരുന്നു.