കോട്ടയം: എട്ടുവര്‍ഷം മുന്‍പ് കാണാതായ വൃദ്ധനെ ഊട്ടിയിലെ വൃദ്ധ സദനത്തില്‍ കണ്ടെത്തി. വെസ്റ്റ് പൊലിസ് സ്ഥലത്തെത്തി ഇയാളെ  കോടതിയില്‍ ഹാജരാക്കി ബന്ധുക്കള്‍ക്ക് കൈമാറി. ചാലുകുന്ന് സ്വദേശി വര്‍ഗീസ് (72) എന്നയാളെയാണ് എട്ടു വര്‍ഷത്തിനു ശേഷം കണ്ടെത്തിയത്.
കഴിഞ്ഞ ജനുവരി 30ന് ചാലുകുന്നിലെ വീട്ടിലേക്ക്് വന്ന ഒരു കോള്‍ ആയിരുന്നു ഇദ്ദേഹത്തെ കണ്ടെത്താന്‍ സഹായിച്ചത്.' ഇന്നെന്റെ പിറന്നാളാണെന്നറിയാമോ' എന്നാണ് വിളിച്ചയാള്‍ ചോദിച്ചത്. ഇത്രയും പറഞ്ഞയുടന്‍ ഫോണ്‍ കട്ടായി. ഫോണ്‍ എടുത്തത് വര്‍ഗീസിന്റെ ഭാര്യയായിരുന്നു. എട്ടു വര്‍ഷം മുന്‍പ് കാണാതായ ഭര്‍ത്താവിന്റെ ശബ്ദമാണോ എന്ന സംശയമുണ്ടായിരുന്നു. ഉടനെ വിവരം വെസ്റ്റ് പൊലിസില്‍ അറിയിച്ചു. വര്‍ഗീസിനെ കാണാതായതിന് പൊലിസ് കേസെടുത്ത് അന്വേഷിച്ചെങ്കിലും ഇത്രയും വര്‍ഷമായിട്ടും വിവരമൊന്നും കിട്ടാതായപ്പോള്‍ കേസ് അവസാനിപ്പിച്ചിരുന്നു. വീട്ടിലേക്ക് വിളിച്ച ഫോണ്‍ നമ്പര്‍ സൈബര്‍ സെല്ലിന്റെ സഹായത്തോടെ നിരീക്ഷിച്ചപ്പോള്‍ അത് ഊട്ടിയില്‍ നിന്നാണെന്ന് മനസിലായി. തുടര്‍ന്ന  പൊലിസ് ഊട്ടിയിലെത്തി നടത്തിയ അന്വേഷണത്തില്‍  ഇദ്ദേഹത്തെ കണ്ടെത്തുകയായിരുന്നു. അവിടെ നിന്ന് കൂട്ടിക്കൊണ്ടുവന്ന കോടതിയില്‍ ഹാജരാക്കി ബന്ധുക്കളെ ഏല്‍പ്പിച്ചു..