ദോഹ: ഗായകനും ഗിറ്റാറിസ്റ്റുമായ വയനാട് സുല്‍ത്താന്‍ ബത്തേരി ടി കെ അബ്ദുല്ല(70)(ഐവിസി അബ്ദുല്ല) ഖത്തറില്‍ നിര്യാതനായി. കരള്‍ രോഗത്തെ തുടര്‍ന്ന് ചികിത്സയിലായിരുന്നു. മൃതദേഹം ഇന്നലെ അബൂഹമൂര്‍ ഖബര്‍സ്ഥാനില്‍ മറവ് ചെയ്തു. ഐസിസി പ്രസിഡണ്ട് എപി മണികണ്ഠന്‍, ഐസിബിഎഫ് പ്രസിഡണ്ട് പിഎന്‍ ബാബു രാജന്‍ ഉള്‍പ്പെടെയുള്ളവര്‍ സംസ്‌കാര ചടങ്ങില്‍ പങ്കെടുത്തു. ഭാര്യ: കോഴിക്കോട് കുറ്റിച്ചിറ എറമാക്കവീട്ടില്‍ ജമീല. മക്കള്‍: ബ്രിജിറ്റ്(സീമെന്‍സ്), ഷഹീന്‍(ഖത്തര്‍ ഗ്യാസ്). 44 വര്‍ഷമായി ഖത്തര്‍ പ്രവാസിയായ ഐവിസി സാമൂഹ്യ സാംസ്‌കാരിക രംഗങ്ങളില്‍ സജീവ സാന്നിധ്യമായിരുന്നു. ഇന്റര്‍ നാഷണല്‍ വീഡിയോ സെന്റര്‍(ഐവിസി) എന്ന പേരില്‍ വീഡിയോ കാസറ്റ് വ്യാപാര സ്ഥാപനം നടത്തിയിരുന്നു. ഏറ്റവും കൂടുതല്‍ ഇംഗ്ലീഷ് ഫിലിം ശേഖരമുള്ള ഖത്തറിലെ കാസറ്റ് ഷോപ്പായിരുന്നു ഇത്.