ദോഹ: ഇന്‍കാസ് കോഴിക്കോട് ജില്ലാ കമ്മറ്റി സംഘടിപ്പിച്ച ഏകദിന പ്രവര്‍ത്തക ക്യാമ്പ് ദോഹയിലെ കോണ്‍ഗ്രസ് പ്രവര്‍ത്തകര്‍ക്കും അനുഭാവികള്‍ക്കും പുത്തനുണര്‍വായി. ഐ സി സി അശോക ഹാളില്‍ സംഘടിപ്പിച്ച പ്രസ്തുത ക്യാമ്പ് ഇന്‍കാസ് സെന്‍ട്രല്‍ കമ്മറ്റി ജനറല്‍ സെക്രട്ടറി സിദ്ദീഖ് പുറായില്‍ ഉദ്ഘാടനം ചെയ്തു.

ജില്ലാ വൈസ് പ്രസിഡണ്ട് സിറാജ് പാലൂര്‍ അധ്യക്ഷം വഹിച്ച ചടങ്ങില്‍ കോഴിക്കോട് ജില്ലാ കോണ്‍ഗ്രസ് പ്രസിഡന്റ് ടി സിദ്ദീഖ് മുഖ്യപ്രഭാഷണം നടത്തി. കോണ്‍ഗ്രസ്് പ്രസ്ഥാനം അതിന്റെ പ്രവര്‍ത്തനം അടിത്തട്ടില്‍ നിന്ന് മുതല്‍ ശക്തിപ്പെടുത്തുകയാണെന്ന് സിദ്ദീഖ് പറഞ്ഞു. പ്രകൃതി-ജൈവ സംരക്ഷണം, സാമൂഹ്യ പ്രതിബദ്ധത എന്നിവ മറ്റു കാര്യങ്ങളെപ്പോലെ തന്നെയോ അവയേക്കാള്‍ ഉപരിയായോ കോണ്‍ഗ്രസ് പ്രവര്‍ത്തകര്‍ ഏറ്റെടുക്കുമെന്നും സിദ്ദീഖ് കൂട്ടിച്ചേര്‍ത്തു.

തുടര്‍ന്ന് നടന്ന പഠന ക്ലാസുകളില്‍ വര്‍ത്തമാനകാല ഇന്ത്യയില്‍ ഇന്ത്യന്‍ നാഷണല്‍ കോണ്‍ഗ്രസിന്റെ പ്രസക്തി എന്ന വിഷയത്തില്‍ കോണ്‍ഗ്രസ് പഠന ഗവേഷണ കേന്ദ്രം ഡയറക്ടര്‍ സി വി ബാലകൃഷ്ണനും, ജനാധിപത്യ ഇന്ത്യയില്‍ ഫാസിസത്തിന്റെ വെല്ലുവിളികള്‍ എന്ന വിഷയത്തില്‍ യൂത്ത് കോണ്‍ഗ്രസ്് സംസ്ഥാന ജനറല്‍ സെക്രട്ടറി വിദ്യാ ബാലകൃഷ്ണനും 'നോര്‍ക്കയും പ്രവാസി സുരക്ഷാ പദ്ധതികളും' എന്ന വിഷയത്തെ ആസ്പദമാക്കി അബ്ദുള്‍ റഊഫ് കൊണ്ടോട്ടിയും ക്ലാസെടുത്തു.
ക്യാമ്പ് ഡയറക്ടര്‍ ഗഫൂര്‍ കെ വി സ്വാഗതവും ജില്ലാ സെക്രട്ടറി വിപിന്‍ മേപ്പയ്യൂര്‍ നന്ദിയും പറഞ്ഞു