അന്തിക്കാട് (തൃശൂര്‍): അടുത്ത അധ്യയന വര്‍ഷം മുതല്‍ തസ്തിക നിര്‍ണയത്തിന് പരിഷ്‌കരിച്ച അധ്യാപക -വിദ്യാര്‍ഥി അനുപാതം കൊണ്ടുവരാന്‍ നീക്കം. 

ധനകാര്യ വകുപ്പ് മന്ത്രിയുടെ ബജറ്റ് പ്രസംഗത്തെ തുടര്‍ന്ന് പൊതുവിദ്യാഭ്യാസ ഡയറക്ടര്‍ ഗവ.സെക്രട്ടറിക്ക് ഇതു സംബന്ധിച്ച് റിപ്പോര്‍ട്ട് നല്‍കിയിട്ടുണ്ട്. 

ഒന്നു മുതല്‍ അഞ്ചു വരെയുള്ള ക്ലാസുകളില്‍ രണ്ടാമത്തെ ഡിവിഷന്‍ അനുവദിക്കാന്‍ നിലവില്‍ 31 കുട്ടികള്‍ മതി. എന്നാല്‍ പരിഷ്‌കരിക്കുന്ന രീതി നിലവില്‍ വരുന്നതോടെ രണ്ട് ഡിവിഷന്‍ അനുവദിക്കണമെങ്കില്‍ 36 കുട്ടികള്‍ വേണം. ആറു മുതല്‍ എട്ടുവരെയുള്ള ക്ലാസുകളില്‍ രണ്ടാമത്തെ ഡിവിഷന് നിലവില്‍ വേണ്ടത് 36 കുട്ടികളാണ്. 

എന്നാല്‍ പുതിയ അനുപാതത്തിന്റെ അടിസ്ഥാനത്തില്‍ രണ്ടാമത്തെ ഡിവിഷന്‍ അനുവദിക്കാന്‍ 41 കുട്ടികള്‍ വേണം. പുതിയ രീതി നിലവില്‍ വന്നാല്‍ രണ്ടാമത്തെ ഡിവിഷന് നിലവിലുള്ളതിനേക്കാള്‍ അഞ്ച് കുട്ടികള്‍ കൂടുതല്‍ വേണം.

നിലവില്‍ ഒരു കുട്ടിയുടെ വര്‍ധന വന്നാല്‍ പോലും പുതിയ തസ്തികയും ഡിവിഷനും അനുവദിക്കുന്നതിലെ അപാകത ധനകാര്യ വകുപ്പ് മന്ത്രി ചൂണ്ടിക്കാട്ടിയിരുന്നു. 

പുതിയ തസ്തിക നിര്‍ണയ അനുപാതം നിലവില്‍ വന്നാല്‍ നൂറുകണക്കിനു അധ്യാപകരുടെ ജോലി നഷ്ടപ്പെടുമെന്ന ആശങ്ക നിലവിലുണ്ട്. നിലവിലെ അധ്യാപക-വിദ്യാര്‍ഥി അനുപാതത്തിനുസരിച്ചാണ് ബന്ധപ്പെട്ട എ.ഇ.ഒ, ഡി.ഇ.ഒമാര്‍ തസ്തിക നിര്‍ണയം നടത്തി അധ്യാപകരെ നിയമിച്ചിട്ടുള്ളത്. 

രണ്ടോ, മൂന്നോ കുട്ടികള്‍ കൂടിയതിനെ അടിസ്ഥാനമാക്കി രണ്ടു ഡിവിഷന്‍ അനുവദിച്ച് തസ്തിക നിര്‍ണയം നടത്തിയ നിരവധി സ്‌കൂളധികൃതര്‍ ഇതോടെ വെട്ടിലായി. ലക്ഷക്കണക്കിനു രൂപ കോഴ നല്‍കിയാണ് നിലവിലെ അനുപാതമനുസരിച്ച് അധ്യാപകരായി ജോലിയില്‍ പ്രവേശിച്ചിട്ടുള്ളത്. 

അതേസമയം 150ല്‍ കൂടുതല്‍ കുട്ടികളുള്ള എല്‍.പി സ്‌കൂളുകളിലും 100ല്‍ കൂടുതല്‍ കുട്ടികളുള്ള യു.പി സ്‌കൂളുകളിലും പ്രധാനാധ്യാപകരെ ക്ലാസ് ചുമതലയില്‍നിന്ന് ഒഴിവാക്കി. എല്‍.പി.എസ്.ടി, യു.പി.എസ്.ടി അധിക തസ്തിക അനുവദിച്ചിരുന്ന നിലവിലെ രീതിയില്‍ മാറ്റം വരുത്തിയിട്ടില്ല.