ന്യൂഡല്‍ഹി: ഇന്ത്യാ സന്ദര്‍ശനത്തിനെത്തുന്ന യു.എസ് പ്രസിഡന്റ് ഡൊണാള്‍ഡ് ട്രംപിനെ താജ്മഹല്‍ സന്ദര്‍ശനത്തില്‍ പ്രധാനമന്ത്രി നരേന്ദ്രമോദി അനുഗമിച്ചേക്കില്ല. ചരിത്ര സ്മാരകങ്ങള്‍ സന്ദര്‍ശിക്കാന്‍ അവര്‍ക്ക് സൗകര്യമൊരുക്കുമെന്നും എന്നാല്‍ ഇതിന് ഔദ്യോഗിക പ്രതിനിധികളുടെ അകമ്പടി ഉണ്ടാവില്ലെന്നും അധികൃതര്‍ അറിയിച്ചു.
താജ് മഹല്‍ സന്ദര്‍ശനത്തിന് ട്രംപിന് മോദിയുടെ അകമ്പടി ഉണ്ടാവുമെന്ന വാര്‍ത്തകള്‍ തെറ്റാണെന്നും അഹമ്മദാബാദ് റാലിയിലാണ് മോദിയുടെ അകമ്പടി ഉണ്ടാവുകയെന്നും അധികൃതര്‍ വ്യക്തമാക്കി. എന്നാല്‍ ആഗ്ര സന്ദര്‍ശിക്കുന്ന ട്രംപിന് 600 ഗ്രാം വെള്ളിയില്‍ തീര്‍ത്ത താജ്മഹലിന്റെ മാതൃകയിലുള്ള താക്കോല്‍ സമ്മാനമായി നല്‍കുമെന്ന് ആഗ്ര മേയര്‍ അറിയിച്ചു. അതേസമയം ട്രംപിന്റെ സന്ദര്‍ശനം അടുത്തിരിക്കെ രാജ്യത്തെ തൊഴിലില്ലായ്മ ഉയര്‍ത്തിക്കാട്ടി മോദിക്കെതിരേ പരിഹാസവുമായി കോണ്‍ഗ്രസ് രംഗത്തെത്തി.