ന്യൂഡല്‍ഹി: പ്രധാനമന്ത്രി നരേന്ദ്ര മോദിയെ വാനോളം പുകഴ്ത്തി സുപ്രിം കോടതിയിലെ മുതിര്‍ന്ന ജഡ്ജിമാരിലൊരാളായ അരുണ്‍ മിശ്ര. പ്രധാനമന്ത്രി നരേന്ദ്ര മോദി രാജ്യാന്തരതലത്തില്‍ പ്രശസ്തി നേടിയ ദാര്‍ശനികനാണെന്നും ആഗോളതലത്തില്‍ ചിന്തിക്കുകയും പ്രാദേശികമായി പ്രവര്‍ത്തിക്കുകയും ചെയ്യുന്ന ബഹുമുഖ പ്രതിഭയാണെന്നും ജസ്റ്റിസ് അരുണ്‍ മിശ്ര പറഞ്ഞു.
സുപ്രിം കോടതി ഓഡിറ്റോറിയത്തില്‍ നടന്ന രാജ്യാന്തര ജുഡീഷ്യല്‍ കോണ്‍ഫറന്‍സില്‍ നന്ദി പ്രസംഗം നടത്തുകയായിരുന്നു മിശ്ര. നീതിന്യായ വ്യവസ്ഥയും മാറുന്ന ലോകവും എന്ന വിഷയത്തിലായിരുന്നു കോണ്‍ഫറന്‍സ്.
കാലഹരണപ്പെട്ട 1,500 നിയമങ്ങള്‍ ഇല്ലാതാക്കിയതിന് പ്രധാനമന്ത്രിയെയും കേന്ദ്ര നിയമമന്ത്രി രവിശങ്കര്‍ പ്രസാദിനെയും അഭിനന്ദിച്ച അരുണ്‍ മിശ്ര, മോദിയുടെ നേതൃത്വത്തില്‍ ഇന്ത്യ രാജ്യാന്തര സമൂഹത്തിലെ ഉത്തരവാദിത്തമുള്ളതും ഏറ്റവും സൗഹാര്‍ദപരവുമായ അംഗമാണെന്നും പറഞ്ഞു.
ദേശീയ, അന്തര്‍ദേശീയ തലങ്ങളില്‍ നീതിന്യായ വ്യവസ്ഥ നേരിടുന്ന വെല്ലുവിളികള്‍ സമാനമാണെന്നും മാറിക്കൊണ്ടിരിക്കുന്ന ലോകത്ത് നീതിന്യായ വ്യവസ്ഥയ്ക്കു സുപ്രധാനമായ പങ്കുണ്ടെന്നും അദ്ദേഹം പറഞ്ഞു.
മാന്യമായ മനുഷ്യ അസ്തിത്വം ഞങ്ങളുടെ പ്രധാന ആശങ്കയാണ്. ആഗോളതലത്തില്‍ ചിന്തിക്കുകയും പ്രാദേശികമായി പ്രവര്‍ത്തിക്കുകയും ചെയ്യുന്ന ബഹുമുഖ പ്രതിഭയ്ക്കു നന്ദി. ഇന്ത്യ ലോകത്തിലെ ഏറ്റവും വലിയ ജനാധിപത്യ രാജ്യമാണ്. ഈ ജനാധിപത്യം എങ്ങനെ വിജയകരമായി പ്രവര്‍ത്തിക്കുന്നുവെന്ന് ആളുകള്‍ ആശ്ചര്യപ്പെടുന്നുവെന്നും അദ്ദേഹം പറഞ്ഞു.
ജസ്റ്റിസ് ലോയയുടെ മരണം സംബന്ധിച്ച വിവാദ കേസ് മുന്‍ഗണന മറികടന്ന് അരുണ്‍ മിശ്രയ്ക്ക് നല്‍കിയെന്നാരോപിച്ചാണ് സുപ്രിംകോടതി ജഡ്ജിമാര്‍ അന്ന് ചീഫ് ജസ്റ്റിസായിരുന്ന ദീപക് മിശ്രയ്‌ക്കെതിരേ വാര്‍ത്താസമ്മേളനം നടത്തിയത്.