അബൂദബി: ഏഷ്യന്‍ കപ്പിന്റെ ക്വാര്‍ട്ടര്‍ ഫൈനല്‍ മത്സരങ്ങള്‍ ഇന്ന് തുടങ്ങും. ഇന്ന് 6.30ന് നടക്കുന്ന മത്സരത്തില്‍ ഏഷ്യന്‍ കരുത്തരായ വിയറ്റ്‌നാം ജപ്പാനെ നേരിടും.
രാത്രി 9.30ന് മറ്റൊരു മത്സരത്തില്‍ ചൈന ഇറാനുമായി കൊമ്പുകോര്‍ക്കും. ഏഷ്യന്‍ കപ്പില്‍ ഇതുവരെ നടന്ന മത്സരങ്ങളിലെല്ലാം മികച്ച പ്രകടനം നടത്തിയാണ് ജപ്പാന്‍ ക്വാര്‍ട്ടറിലെത്തിയത്. നാലു മത്സരങ്ങളില്‍ നിന്നായി ഏഴു ഗോളുകളാണ് ജപ്പാന്‍ അടിച്ചുകൂട്ടിയിട്ടുള്ളത്. മൂന്ന് ഗോള്‍ വഴങ്ങുകയും ചെയ്തു. അതേസമയം നാല് മത്സരം നേരിട്ട വിയറ്റ്‌നാം രണ്ട് മത്സരങ്ങളില്‍ മാത്രമാണ് വിജയിച്ചിട്ടുള്ളത്. ഗ്രൂപ്പ് ഘട്ടത്തിലെ ആദ്യ മത്സരത്തില്‍ 4-2ന് ഫിലിപ്പൈന്‍സിനെ പരാജയപ്പെടുത്തിയിരുന്നു. ഇറാഖിനോടും ഇറാനോടും പരാജയപ്പെടുകയും ചെയ്ത വിയറ്റ്‌നാം യമനെ പരാജയപ്പെടുത്തി.
രണ്ടാം ക്വാര്‍ട്ടറില്‍ ഇറാനും ചൈനയും തമ്മിലാണ് മത്സരം. ലോകകപ്പില്‍ കളിച്ച് പരിചയമുള്ള ഇറാന്‍ മികച്ച ഫോമിലാണുള്ളത്. ഗ്രൂപ്പ് ഘട്ടത്തിലെ ആദ്യ മത്സരത്തില്‍ എതിരില്ലാത്ത അഞ്ചുഗോളുകള്‍ക്കായിരുന്നു ഇറാന്‍ യമനെ പരാജയപ്പെടുത്തിയത്. പ്രീക്വാര്‍ട്ടറില്‍ എതിരില്ലാത്ത രണ്ട് ഗോളുകള്‍ക്ക് ഒമാനെ പരാജയപ്പെടുത്തിയാണ് ഇറാന്‍ ക്വാര്‍ട്ടറിലെത്തിയിട്ടുള്ളത്.
മികച്ച ഫോമില്‍ നില്‍ക്കുന്ന ഇറാന്‍ ഗോള്‍കീപ്പര്‍ അലിറെസയെ കീഴടക്കണമെങ്കില്‍ ചൈനക്ക് അല്‍പം വിയര്‍ക്കേണ്ടി വരും. ദുബൈയിലെ അല്‍മഖ്തൂം സ്‌റ്റേഡിയത്തിലാണ് ജപ്പാനും വിയറ്റ്‌നാമും തമ്മിലുള്ള മത്സരം നടക്കുന്നത്. അബൂദബി മുഹമ്മദ് ബിന്‍ സയിദ് സ്റ്റേഡിയത്തില്‍ ചൈനയും ഇറാനും തമ്മില്‍ കൊമ്പുകോര്‍ക്കും.