ദമാം: അപകടങ്ങൾ കാരണംനമ്മുടെ റോഡുകൾ കൊലക്കളങ്ങളായി മാറുന്ന അവസ്ഥ ഭീതിജനകമാണെന്നും നിരത്തുകൾ കുരുതിക്കളങ്ങൾ ആകുന്നതിനെതിരെ പരിഹാരം കാണണമെന്നും നവയുഗം സാംസ്ക്കാരികവേദി കേന്ദ്രകമ്മിറ്റി ആവശ്യപ്പെട്ടു. അമിതവേഗത, ഡ്രൈവർമാരുടെ അശ്രദ്ധ, ട്രാഫിക്ക് നിയമങ്ങൾ പാലിയ്ക്കാതിരിയ്ക്കൽ, ലഹരി ഉപയോഗം, ചില റോഡുകളുടെ മോശം അവസ്ഥ, അധികൃതരുടെ അലംഭാവം തുടങ്ങിയ പല കാരണങ്ങൾ കാരണം ഒട്ടേറെ മനുഷ്യജീവനുകളാണ് നിരത്തുകളിൽ ഇല്ലാതാകുന്നത്. ഒട്ടേറെ കുടുംബങ്ങൾ ഇതിനാൽ വഴിയാധാരമാകുന്നു. ഓരോ വർഷവും രോഗങ്ങൾ വന്നു മരിയ്ക്കുന്നതിനേക്കാളും കൂടുതൽ ആളുകൾ റോഡപകടങ്ങൾ കാരണം മരണമടയുന്നു. അതിലും ഇരട്ടിയിലധികം ആളുകൾ പരിക്ക് പറ്റി ദുരിതത്തിലായി ജീവിയ്ക്കുകായും ചെയ്യുന്ന ഗുരുതരമായ അവസ്ഥയിൽ സർക്കാരിന്റെയും അധികാരികളുടെയും അടിയന്തരശ്രദ്ധ പതിയണമെന്നും ഇതിനെതിരെ ആധുനികവും ശാസ്ത്രീയവുമായ ഒരു ഗതാഗത നയവും, ആസൂത്രണങ്ങളും, നിയമങ്ങളും, ബോധവൽക്കരണവും നടപ്പിലാക്കാൻ സർക്കാരുകൾ ശ്രമിയ്ക്കണമെന്നും നവയുഗം ആവശ്യപ്പെട്ടു.
     തമിഴ്‌നാട്ടില്‍ അവിനാശിയില്‍ കെ.എസ്.ആര്‍.ടി.സി വോള്‍വോ ബസും, കണ്ടെയ്‌നര്‍ ലോറിയും കൂട്ടിയിടിച്ചുണ്ടായ അപകടത്തിൽ 19 പേർ മരണമടഞ്ഞ ദാരുണ സംഭവത്തിൽ നവയുഗം സാംസ്ക്കാരികവേദി കേന്ദ്രകമ്മിറ്റി അഗാധമായ ദുഃഖം രേഖപ്പെടുത്തി.