ന്യൂഡല്‍ഹി: കൊളീജിയം തീരുമാനം പരസ്യമാക്കാതെ മൂടിവച്ച ചീഫ്ജസ്റ്റിസ് രഞ്ജന്‍ ഗൊഗോയിയുടെ നടപടി നിരാശപ്പെടുത്തിയെന്ന് സുപ്രിംകോടതി മുന്‍ ജഡ്ജി ജസ്റ്റിസ് മദന്‍ ബി. ലോക്കൂര്‍. ഇന്നലെ കോണ്‍സ്റ്റിറ്റിയൂഷന്‍ ക്ലബ്ബില്‍ അഭിഭാഷക കൂട്ടായ്മ സംഘടിപ്പിച്ച ചടങ്ങിലാണ് അദ്ദേഹം ഇത്തരത്തില്‍ പ്രതികരിച്ചത്.
ഡല്‍ഹി ഹൈക്കോടതി ചീഫ്ജസ്റ്റിസ് മലയാളിയായ ജസ്റ്റിസ് രാജേന്ദ്രമേനോന്‍, രാജസ്ഥാന്‍ ഹൈക്കോടതി ചീഫ്ജസ്റ്റിസ് പ്രദീപ് നന്ദര്‍ജോഗ് എന്നിവരെ സുപ്രിംകോടതിയിലേക്ക് ഉയര്‍ത്തിയുള്ള തീരുമാനം സുപ്രിംകോടതി വെബ്‌സൈറ്റില്‍ പരസ്യമാക്കാതിരുന്ന നടപടിയെയാണ് ലോക്കൂര്‍ വിമര്‍ശിച്ചത്. കൊളീജിയം സംവിധാനം പരാജയമാണെന്ന് അഭിപ്രായമില്ല. പക്ഷേ ചില അനിവാര്യ തിരുത്തലുകള്‍ ആവശ്യമാണെന്നും അദ്ദേഹം പറഞ്ഞു.
മുന്‍ ചീഫ്ജസ്റ്റിസ് ദീപക് മിശ്ര തന്നിഷ്ടം ചെയ്യുന്നുവെന്നാരോപിച്ച് കോടതി നിര്‍ത്തിവച്ച് വാര്‍ത്താസമ്മേളനം വിളിച്ച രഞ്ജന്‍ ഗൊഗോയി അടക്കമുള്ള നാലുജഡ്ജിമാരില്‍ ഒരാളായിരുന്നു മദന്‍ ബി. ലോക്കൂര്‍. അന്നത്തെ കോടതിയുടെ രീതിയില്‍ നിന്ന് യാതൊരു മാറ്റവും ഉണ്ടായില്ലെന്ന് വാര്‍ത്താസമ്മേളനത്തില്‍ പങ്കെടുത്ത ജസ്റ്റിസ് ജെ. ചെലമേശ്വറും അടുത്തിടെ വിമര്‍ശിച്ചിരുന്നു. ഇന്നലെ നടന്ന ചടങ്ങില്‍ പങ്കെടുത്ത മുതിര്‍ന്ന മാധ്യമപ്രവര്‍ത്തകന്‍ രാജ്ദീപ് സര്‍ദേശായിയും ചീഫ്ജസ്റ്റിസിന്റെ പ്രവര്‍ത്തിയെ വിമര്‍ശിച്ചു. അന്നത്തെ വാര്‍ത്താസമ്മേളനം കൊണ്ട് എന്തെങ്കിലും നേടിയോയെന്ന് അദ്ദേഹം ചോദിച്ചു.