ഗോവ: പരിശീലനപ്പറക്കലിനിടെ ഗോവയില്‍ നാവികസേനയുടെ മിഗ്29 വിമാനം തകര്‍ന്നു വീണു. ഇന്നലെ രാവിലെ 10.30ഓടെയാണ് സംഭവം. അതേസമയം പൈലറ്റ് അത്ഭുതകരമായി രക്ഷപ്പെട്ടു.  ദക്ഷിണ ഗോവ വാസ്‌കോയിലെ ഐ.എന്‍.എസ് ഹാന്‍സ താവളത്തില്‍ നിന്നും പറന്നുയര്‍ന്ന വിമാനമാണ് അപകടത്തില്‍ പെട്ടത്. 

ദിവസേനയുള്ള പരിശീലനപ്പറക്കലിനിടെയാണ് അപകടം നടന്നതെന്നും പൈലറ്റ് സുരക്ഷിതനാണെന്നും നാവികസേനാ വക്താവ് അറിയിച്ചു. അതേസമയം സംഭവത്തില്‍ അന്വേഷണത്തിന് ഉത്തരവിട്ടിട്ടുണ്ടെന്നും അദ്ദേഹം പറഞ്ഞു. മൂന്ന് മാസത്തിനിടെ ഇത് രണ്ടാം തവണയാണ് ഗോവയില്‍ നാവികസേനാ വിമാനം അപകടത്തില്‍ പെടുന്നത്. കഴിഞ്ഞ നവംബറില്‍ ഡാബോളിമില്‍ നിന്ന് പുറപ്പെട്ട മറ്റൊരു മിഗ്29 കെ വിമാനവും തകര്‍ന്നിരുന്നു.