പാലക്കാട്:കുപ്രസിദ്ധ കുറ്റവാളി പേഴുങ്കര നൗഷാദ് മാര്‍ച്ച് മൂന്നിന് രാത്രി പത്തിരിപാലയില്‍ വെച്ച് കഞ്ചാവ് കടത്തുമ്പോള്‍ എക്‌സൈസിന്റെ പിടിയിലായതായി അസി.എക്‌സൈസ് കമ്മീഷനര്‍ എം.എസ്.വിജയന്‍ പറഞ്ഞു.
രാത്രി ഒന്‍പതിന് പത്തിരിപ്പാല ഹയര്‍ സെക്കന്‍ഡറി സ്‌കൂളിന് മുന്നില്‍ വെച്ച് വാഹന പരിശോധന നടത്തിവന്ന പറളി എക്‌സൈസ് സംഘത്തെ കണ്ട് പെട്ടി ഓട്ടോയില്‍ കഞ്ചാവുമായി വന്നിരുന്ന പ്രതി വെട്ടിച്ചുകടത്താന്‍ ശ്രമിക്കുമ്പോള്‍ പിന്തുടര്‍ന്നാണ് കീഴ്‌പെടുത്തിയത്. പ്രതിയില്‍ നിന്നും 1.090 കി.ഗ്രാം കഞ്ചാവ് പിടിച്ചെടുത്തിട്ടുണ്ട്. ഇരുട്ടില്‍ ഓടിമറയാന്‍ ശ്രമിച്ച പ്രതിക്ക് വീണ് പരിക്കേറ്റതിനാല്‍ ജില്ലാ ആശുപത്രിയില്‍ പ്രവേശിപ്പിച്ച് റിമാന്‍ഡ്  ചെയ്തിരിക്കുകയാണ്. പത്തിരിപ്പാല നെഹ്‌റു കോളജ്, മുണ്ടൂര്‍ എം.ഇ.എസ്, പത്തിരിപ്പാല എച്ച്.എസ്.എസ് എന്നിവിടങ്ങളിലെ വിദ്യാര്‍ഥികള്‍ക്ക് കഞ്ചാവ് എത്തിച്ചു നല്‍കുന്നതിലെ പ്രധാന കണ്ണിയാണ് അറസ്റ്റിലായ നൗഷാദ്.
പറളി എക്‌സൈസ് ഇന്ഡസ്‌പെക്ടര്‍ പ്രശോഭ്, അസി.എക്‌സൈസ് ഇന്‍സ്‌പെക്ടര്‍ ഹേമന്ത്കുമാര്‍, പ്രിവെന്റീവ് ഓഫീസര്‍ പ്രേമാ നന്ദകുമാര്‍, സി.ഇ.ഒ മാരായ ഷജികുമാര്‍, സജീഷ്‌കുമാര്‍, ശ്രീജിത്ത്, ഡ്രൈവര്‍ മുരളി, മോഹനന്‍ എന്നിവരാണ് വാഹന പരിശോധന സംഘത്തില്‍ ഉണ്ടായിരുന്നത്.