ചേര്‍ത്തല: ബൈക്കില്‍ കെ.എസ്.ആര്‍.ടി.സി ബസ് തട്ടി മറിഞ്ഞ് റോഡില്‍ വീണ യുവാവിന്റെ കാലില്‍ ബസിന്റെ പിന്‍ചക്രം കയറിയിറങ്ങി ഗുരുതരമായി പരിക്കേറ്റു.
കൊല്ലം ശാസ്താംകോട്ട പെരുവേലിയ്ക്കല്‍ കോയിക്കല്‍ നികര്‍ത്ത് വീട്ടില്‍ നിര്‍മ്മല്‍ (21) ആണ് കാലിന് ഗുരുതര പരിക്കുകളോടെ ആലപ്പുഴ വണ്ടാനം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചിട്ടുള്ളത്. ദേശീയ പാതയില്‍ തുറവൂര്‍ ട്രാഫിക് സിഗ്‌നലിന് സമീപം ഇന്നലെ രാവിലെയായിരുന്നു അപകടം.
നിര്‍മ്മല്‍ സഞ്ചരിച്ച ബൈക്കിന്റെ ഹാന്റിലില്‍ ബസ് തട്ടിയതിനെ തുടര്‍ന്ന് ഇയാള്‍ ബൈക്കില്‍നിന്ന് തെറിച്ച്ബസിന്റ അടിയിലേയ്ക്ക് വീഴുകയായിരുന്നു. വീഴ്ചയില്‍ വലത് കാലിലുടെ ബസിന്റെ ടയര്‍ കയറി. അപകടം കണ്ടു നിന്ന സമീപത്തെ ഓട്ടോ ഡ്രൈവര്‍മാര്‍ ബഹളം വെച്ച് ഓടിയെത്തി ഇയ്യാളെ പുറത്തെടുക്കുകയായിരുന്നു. ഉടന്‍ തുറവൂര്‍ ഗവ. ആശുപത്രിയില്‍ എത്തിച്ച് പ്രഥമ ശുശ്രൂഷ നല്‍കിയ ശേഷം വണ്ടാനം മെഡിക്കല്‍ക്കോളേജ് ആശുപത്രിയില്‍ പ്രവേശിപ്പിച്ചു. കുത്തിയതോട് പോലീസ് കേസെടുത്തു.