തിരൂര്‍: വാട്ടര്‍ അതോറിറ്റിയുടെ ശുദ്ധജലവിതരണ പൈപ്പ് പൊട്ടി വെള്ളം വന്‍തോതില്‍ ചോര്‍ന്നതോടെ മണ്ണൊലിച്ച് തിരൂര്‍ റെയില്‍വേ മേല്‍പ്പാലം റോഡ് ഇടിഞ്ഞു താഴ്ന്നു. പാലത്തിന് മുകളിലെ റോഡില്‍ പൊടുന്നനെ ഗര്‍ത്തം രൂപപ്പെട്ടതോടെ യാത്രക്കാര്‍ പരിഭ്രാന്തരായി. ഇന്നലെ രാവിലെ പതിനൊന്നോടെയായിരുന്നു സംഭവം. മലപ്പുറം മഞ്ചേരി റോഡിനെ ബന്ധിപ്പിക്കുന്ന തിരൂര്‍ സിറ്റി ജങ്ഷനിലെ റെയില്‍വേ മേല്‍പ്പാലം റോഡാണ് ഇടിഞ്ഞു താഴ്ന്നത്.  നിറയെ യാത്രക്കാരുമായി യാത്രാ ബസ് കടന്നു പോയ ഉടനെയാണ് പഴയ പാലം റോഡ് തകര്‍ന്നത്. പിറകില്‍ എത്തിയ ബൈക്ക് യാത്രക്കാരും കുഴിയില്‍ വീഴാതെ രക്ഷപ്പെട്ടു. ഇതോടെ വന്‍ദുരന്തമാണ് വഴിമാറിയത്. സംഭവത്തെ തുടര്‍ന്ന് പൊലിസും പൊതുമരാമത്ത് അധികൃതരും സ്ഥലത്തെത്തി ഉടനടി പാലത്തിലൂടെയുള്ള ഗതാഗതം ഭാഗികമായി തടഞ്ഞു. ഇതോടെ മണിക്കൂറുകളോളം തിരൂര്‍ നഗരം ഗതാഗതകുരുക്കിലായി.  സിറ്റി ജങ്ഷനിലെ റെയില്‍വേ പാലത്തിലൂടെയാണ് വാട്ടര്‍ അതോറിറ്റിയുടെ വലിയ പൈപ്പ് കടന്നുപോകുന്നത്. ഈ പൈപ്പില്‍ ചോര്‍ച്ചയുണ്ടായി ശക്തമായി വെള്ളം പുറത്തേക്ക് ചീറ്റിയതോടെ മണ്ണൊലിച്ച് റോഡില്‍ ഗര്‍ത്തം രൂപപ്പെടുകയായിരുന്നു. എന്നാല്‍ അപകട സാധ്യതയേറെയുള്ള സംഭവമുണ്ടായിട്ടും പൊതുമരാമത്ത് പാലം വിഭാഗവും റെയില്‍വേയും ഉത്തരവാദിത്വത്തില്‍നിന്ന് ഒഴിഞ്ഞുമാറുന്ന സമീപനമാണ് സ്വീകരിച്ചത്. ഗതാഗതം മണിക്കൂറുകളോളം മുടങ്ങിയതും യാത്രക്കാരുടെ സുരക്ഷയും കണക്കിലെടുത്ത് ഇന്നലെ ഉച്ചയോടെ തന്നെ ജെ.സി.ബി എത്തിച്ച് മണ്ണുമാറ്റി വാട്ടര്‍ അതോറിറ്റി പൈപ്പിന്റെ തകരാര്‍ പരിഹരിക്കാന്‍ നടപടി തുടങ്ങി. റെയില്‍വേയില്‍ പണമടച്ചാണ് റെയില്‍വേ പാലം നിര്‍മിക്കുന്നതെന്നും അതിനാല്‍ പിന്നീട് പാലത്തിന്റെ പരിപാലന ചുമതല റെയില്‍വേയ്ക്കാണെന്നും പൊതുമരാമത്ത് പാലം വിഭാഗം ഡിവിഷനല്‍ എന്‍ജിനീയര്‍ ഹരീഷ് പറഞ്ഞു. പ്രദേശത്ത് പുതിയ പാലത്തിന്റെ പ്രവൃത്തി പൂര്‍ത്തിയായെങ്കിലും അപ്രോച്ച് റോഡ് നിര്‍മിക്കാത്തതിനാല്‍ ഇതുവരെ ഗതാഗതത്തിന് തുറന്നുകൊടുക്കാനായിട്ടില്ല.