മട്ടന്നൂര്‍: കണ്ണൂര്‍ വിമാനത്താവളത്തില്‍ വിമാനം സുഗമമായി ഇറക്കുന്നതിനു മൊബൈല്‍ കമ്പനികളുടെ ടവറുകള്‍ ഉയരം കുറയ്ക്കുന്ന പ്രവൃത്തി ആരംഭിച്ചു. വിമാനത്താവള പരിസരങ്ങളിലായുള്ള എട്ടു ടവറുകളാണ് ഉയരം കുറയ്ക്കുന്നത്. വിമാനത്താവളത്തില്‍ നിന്നു കൂടുതല്‍ വിമാനങ്ങള്‍ സര്‍വിസ് നടത്തുമ്പോള്‍ കൂറ്റന്‍ ടവറുകള്‍ ഭീഷണിയാകുന്നത് കൊണ്ടാണ് ടവറുകളുടെ ഉയരം കുറയ്ക്കാന്‍ തീരുമാനിച്ചത്.
കീഴല്ലൂര്‍ പഞ്ചായത്തിലെ വെള്ളിയാംപറമ്പിലെ നാലു ടവറുകളും തലശ്ശേരി ഇരിക്കൂര്‍ റോഡില്‍ പനയത്താംപറമ്പിലെ രണ്ടും പാലയോട് വെള്ളിയാംപറമ്പ് റോഡിലെയും ഇരിട്ടി നഗരസഭയിലെ പഴശി ഡാം റോഡിലെ ഒന്നും ടവറുകളാണ് ഉയരം കുറയ്ക്കുന്നത്. ബി.എസ്.എന്‍.എല്‍, വോഡാഫോണ്‍, ഐഡിയ, എയര്‍ടെല്‍, ജിയോ എന്നീ മൊബൈല്‍ കമ്പനികളുടെ കൂറ്റന്‍ ടവറുകളാണ് വിമാനത്തിനു ഭീഷണിയായി കണ്ടെത്തിയിരുന്നു. 60 മീറ്റര്‍ മുതല്‍ 100 മീറ്റര്‍ വരെ ഉയരത്തിലുള്ള ടവറുകളാണ് നെറ്റ്‌വര്‍ക്ക് കവറേജ് ലഭിക്കുന്നതിനു മൊബൈല്‍ കമ്പനികള്‍ വിവിധ സ്ഥലങ്ങളില്‍ സ്ഥാപിച്ചിരുന്നത്.
വിമാനത്താവളത്തിലെ സിഗ്‌നല്‍ പരിധിക്കുള്ളില്‍ വിമാനം പരീക്ഷണ പറക്കല്‍ നടത്തിയതിനു ശേഷം ടവറുകളുടെ ഉയരം കുറയ്ക്കണമെന്ന് പൈലറ്റ് നിര്‍ദേശിച്ചിരുന്നു.
ഇതേ തുടര്‍ന്നു മൊബൈല്‍ കമ്പനി അധികൃതരും കിയാല്‍ അധികൃതരും ചേര്‍ന്നു ചര്‍ച്ച നടത്തിയ ശേഷമാണ് ടവറിന്റെ ഉയരം കുറയ്ക്കാന്‍ തീരുമാനിച്ചത്. 30 മീറ്റര്‍ ഉയരത്തില്‍ ടവറുകള്‍ നില നിര്‍ത്താണ് അധികൃതര്‍ നിര്‍ദ്ദേശിച്ചിരുന്നത്. നൂറു മീറ്റര്‍ ഉയരത്തിലുള്ള വെള്ളിയാംപറമ്പിലെ ബി.എസ്.എന്‍.എല്‍ ടവര്‍ 30 മീറ്ററാക്കി ചുരുക്കി.
മൊബൈല്‍ കമ്പനി അധികൃതരും കിയാല്‍ അധികൃതരും ടവറുകള്‍ പരിശോധിച്ചു. ടവറുകളുടെ ഉയരം കുത്തനെ കുറയ്ക്കുന്നതിനാല്‍ മൊബെല്‍ നെറ്റ് വര്‍ക്ക് കവറേജ് വലിയ തോതില്‍ കുറയാനിടയാകും.