കുന്നംകുളം: കടവല്ലൂരില്‍ നിയന്ത്രണം വിട്ട കാര്‍ താഴ്ചയിലേക്ക് മറിഞ്ഞു. കാറുടമ അത്ഭുതകരമായി രക്ഷപ്പെട്ടു. പെരുമ്പിലാവ് തൃശൂര്‍ കുറ്റിപ്പുറം സംസ്ഥാന പാതയില്‍ കടവല്ലൂര്‍ ഹൈസ്‌കൂള്‍ ബസ് സ്റ്റോപ്പിന് സമീപം നിയന്ത്രണം വിട്ട കാര്‍ റോഡിനു സമീപം കൈവരികള്‍ ഇടിച്ച് ആറടിയോളം താഴ്ചയിലേക്കാണ് മറിഞ്ഞത്. കാറുടമ മുണ്ടൂര്‍ ചീരന്‍ വിനോദ് (49) അത്ഭുതകരമായി രക്ഷപ്പെട്ടു.
ബുധനാഴ്ച രാവിലെയാണ് അപകടം. ചാലിശേരിയില്‍ നിന്ന് ചങ്ങരംകുളത്തുള്ള സ്ഥാപനത്തിലേക്ക് പോകുകയായിരുന്ന വിനോദിന്റെ കാറാണ് നിയന്ത്രണം വിട്ട് എതിര്‍ ദിശയിലേക്ക് തല കീഴായി മറിഞ്ഞത്. സംഭവം നടക്കുന്നതിന് സെക്കന്റുകള്‍ വ്യാത്യാസത്തില്‍ അതു വഴി കടന്നു പോയ സ്‌കൂട്ടര്‍ യാത്രക്കാരനും രക്ഷപ്പെട്ടു.
സമീപത്തുള്ള കച്ചവടക്കാരും വീട്ടുടമയും എത്തി കാറിനകത്ത് നിന്ന് വിനോദിനെ പുറത്ത് എടുക്കുകയായിരുന്നു.
കൈവിരലിന് സാരമായ പരുക്കേറ്റ വിനോദിനെ കുന്നംകുളത്തെ സ്വകാര്യ ആശുപത്രിയില്‍ പ്രവേശിപിച്ചു.