ലണ്ടന്‍: യുവേഫാ ചാംപ്യന്‍സ് ലീഗില്‍ ബയേണ്‍ മ്യൂണിക്കും ബാഴ്‌സലോണയും ഇന്ന് കളത്തിലിറങ്ങും. 

ഇന്ന് രാത്രി 1.30ന് നടക്കുന്ന പ്രീ ക്വാര്‍ട്ടര്‍ മത്സരത്തില്‍ പ്രീമിയര്‍ ലീഗ് ടീമായ ചെല്‍സിയും ജര്‍മന്‍ കരുത്തരായ ബയേണ്‍ മ്യൂണിക്കും തമ്മിലാണ് മത്സരം. ഗ്രൂപ്പ് ബിയില്‍ നിന്ന് ഗ്രൂപ്പ് ചാംപ്യന്മാരായിട്ടായിരുന്നു ബയേണ്‍ പ്രീ ക്വാര്‍ട്ടറില്‍ പ്രവേശിച്ചത്. ചെല്‍സിയുടെ ഹോം ഗ്രൗണ്ടായ സ്റ്റാംഫോര്‍ഡ് ബ്രിഡ്ജിലാണ് മത്സരം. 

ഗ്രൂപ്പ് എച്ചിലെ രണ്ടാം സ്ഥാനക്കാരായിട്ടായിരുന്നു ചെല്‍സി പ്രീ ക്വാര്‍ട്ടറില്‍ പ്രവേശിച്ചത്. ഈ ഗ്രൂപ്പില്‍ നിന്ന് വലന്‍സിയയായിരുന്നു ഗ്രൂപ്പ് ചാംപ്യന്‍മാരായത്. ബുണ്ടസ്‌ലിഗയില്‍ മികച്ച മുന്നേറ്റം നടത്തുന്ന ബയേണിനെ തോല്‍പിക്കാനുള്ള ഒരുക്കത്തിലാണ് ചെല്‍സി. 

കാരണം സ്വന്തം ഗ്രൗണ്ടില്‍ സ്വന്തം കാണികള്‍ക്ക് മുന്നിലാണ് ചെല്‍സി കളിക്കുന്നത്. അതേ സമയം പ്രീമിയര്‍ ലീഗില്‍ മികച്ച പ്രകടനം നടത്തുന്ന ചെല്‍സിയെ മുട്ടുകുത്തിക്കണമെങ്കില്‍ ബയേണിന് അല്‍പം കഠിന പരിശ്രമം ചെയ്യേണ്ടി വരും. 

രാത്രി 1.30ന് നടക്കുന്ന  മറ്റൊരു മത്സരത്തില്‍ ബാഴ്‌സലോണ നാപോളിയെ നേരിടും. കഴിഞ്ഞ ദിവസം ലാലിഗയില്‍ ലയണല്‍ മെസ്സിയുടെ ഗോളിലൂടെ പട്ടികയില്‍ ഒന്നാം സ്ഥാനത്തേക്ക് തിരിച്ചെത്തിയ ബാഴ്‌സ മികച്ച ആത്മവിശ്വാസത്തിലാണ്.   

സീരി എ പോരാട്ടത്തില്‍ നാപോളി ആറാം സ്ഥാനത്താണ് ഉള്ളതെങ്കിലും ബാഴ്‌സക്ക് കനത്ത വെല്ലുവിളിയാകും നാപോളി. ഏത് ചെറിയ ടീമിനോടും തോല്‍ക്കുന്ന ബാഴ്‌സ നാപോളിയുമായി ജയിക്കണമെങ്കില്‍ അല്‍പം വിയര്‍പ്പൊഴുക്കേണ്ടി വരും.  ഗ്രൂപ്പ് എഫില്‍ നിന്ന് ഗ്രൂപ്പ് ചാംപ്യന്‍മാരായിട്ടായിരുന്നു ബാഴ്‌സലോണ പ്രീ ക്വാര്‍ട്ടറിലെത്തിയിട്ടുള്ളത്. അതേ സമയം ലിവര്‍പൂള്‍ ഉള്‍പ്പെടുന്ന ഗ്രൂപ്പ് ഇയില്‍ നിന്ന് രണ്ടാം സ്ഥാനക്കാരായിട്ടാണ് നാപോളി വരുന്നത്.