കൊല്ലം: ഡെങ്കിപ്പനി പ്രതിരോധ പ്രവര്‍ത്തനങ്ങളില്‍ ആരോഗ്യ വകുപ്പിനൊപ്പം പൊലിസും പങ്കാളിയായി. കടയ്ക്കല്‍ ഇഴമ്പത്തൂര്‍ പ്രദേശത്തെ സ്വകാര്യ സ്ഥാപനത്തിന്റെ പരിസരത്ത് കൊതുകു പെരുകുന്ന തരത്തില്‍ കൂടിക്കിടക്കുന്ന പ്ലാസ്റ്റിക് വസ്തുക്കള്‍ പൊലിസിന്റെ  സഹായത്തോടെ ആരോഗ്യ വകുപ്പ് നീക്കം ചെയ്തു.
റബര്‍ തോട്ടങ്ങളിലെ ചിരട്ടകളിലും സ്ഥാപനങ്ങളില്‍ നിന്നും അലക്ഷ്യമായ കൂട്ടിയിട്ടിരിക്കുന്ന പാഴ് വസ്തുക്കള്‍, ടയറുകള്‍ തുടങ്ങിയവയില്‍ വെള്ളം കെട്ടിനില്‍ക്കുന്നതായി കണ്ടാല്‍  നിയമ നടപടിയെടുക്കുമെന്ന് എസ്.ഐ റിന്‍സ് എം തോമസ് അറിയിച്ചു. കൊതുകു നിയന്ത്രണ പ്രവര്‍ത്തനങ്ങളുടെ ഭാഗമായി കുമ്മിള്‍, നിലമേല്‍, കടയ്ക്കല്‍ പഞ്ചായത്ത് പ്രദേശങ്ങളില്‍ നടത്തിയ പരിശോധനകള്‍ക്ക് ഹെല്‍ത്ത് സൂപ്പര്‍വൈസര്‍ ഷാനവാസ് നേതൃത്വം നല്‍കി.