മാനന്തവാടി: സിവില്‍ സപ്ലൈസിന്റെ നികുതി കുടിശ്ശിക ഈടാക്കാന്‍ ജപ്തി നടപടികളുമായി റവന്യൂ വകുപ്പ്. ഒന്നരക്കോടി രൂപയോളമാണ് സിവില്‍ സപ്ലൈസ് അധികൃതര്‍ വിവിധ വര്‍ഷങ്ങളിലായി കുടിശ്ശിക വരുത്തിയിരുന്നത്. 2009-10 വര്‍ഷത്തില്‍ 55,89,230 രൂപ, 2010-11 വര്‍ഷത്തില്‍ 37,03,630 രൂപ, 2011-12 വര്‍ഷത്തില്‍ 16,71,655 രൂപ, 2012-13 വര്‍ഷത്തില്‍ 56,53,126 രൂപ എന്നിങ്ങനെയാണു കുടിശ്ശിക വന്നിരിക്കുന്നത്.
ഇതിന്റെ അടിസ്ഥാനത്തില്‍ സെയില്‍സ് ടാക്‌സ് ഡിപ്പാര്‍ട്ട്‌മെന്റ് റവന്യൂ റിക്കവറി നടപടികളിലേക്കു തിരിഞ്ഞിരിക്കുകയാണ്. തുടര്‍ന്ന് കലക്ടറുടെ നിര്‍ദേശപ്രകാരം ഇന്നു രാവിലെ 11ഓടെ മാനന്തവാടി വില്ലേജ് ഓഫിസറും സംഘവും സിവില്‍ സപ്ലൈസ് ഗോഡൗണിലെത്തി ജപ്തി നടപടികള്‍ ആരംഭിക്കുകയായിരുന്നു. ആദ്യഘട്ടമെന്ന നിലയില്‍ സിവില്‍ സപ്ലൈസിന്റെ മൊബൈല്‍ വാഹനം ജപ്തി ചെയ്യാന്‍ നടപടികള്‍ സ്വീകരിക്കുകയായിരുന്നു. ഏകദേശം 10 ലക്ഷം രൂപ മതിപ്പുവിലയുള്ള ഭാരത് ബെന്‍സിന്റെ വാഹനമാണ് മൊബൈല്‍ മാവേലി യൂനിറ്റ് വാഹനമായി ഉപയോഗിക്കുന്നത്. ഇതാണ് ഇപ്പോള്‍ ജപ്തി ചെയ്യുന്നത്.
എന്നാല്‍ സിവില്‍ സപ്ലൈസ് അധികൃതരുടെ അനാസ്ഥ സാധാരണക്കാരെയാണു വലക്കുക. വാഹനം ജപ്തി ചെയ്താല്‍ ഗ്രാമീണമേഖലകളിലുള്ള മൊബൈല്‍ മാവേലി സേവനങ്ങള്‍ തടസപ്പെടും. എന്നാല്‍ വില്‍പന നികുതി അതതു വര്‍ഷങ്ങളില്‍ തങ്ങള്‍ അടച്ചുവന്നിരുന്നതായും സാങ്കേതിക പിഴവുകള്‍ സംഭവിച്ചതിനാലാണു തുക കണക്കില്‍ വരാതിരിക്കാന്‍ കാരണമെന്നും സിവില്‍ സപ്ലെസ് അധികൃതര്‍ വ്യക്തമാക്കി.