തൊടുപുഴ:   ഹൈറേഞ്ചിലെ ഏലത്തോട്ടങ്ങളില്‍ ഉപയോഗിക്കാനായി നിരോധിത കീടനാശിനികള്‍ തമിഴ്‌നാട്ടില്‍നിന്നു വന്‍തോതില്‍ അതിര്‍ത്തികടന്നെത്തുന്നു.
മോണോക്രോട്ടോഫോസ്, ട്രൈസാഫോസ്, പ്രെഫനോഫോസ്, ഫോറേറ്റ്, ഫുറഡാന്‍ തുടങ്ങിയ നിരോധിത കീടനാശിനികളാണ് നിയന്ത്രണമില്ലാതെ തമിഴ്‌നാട്ടില്‍നിന്ന് എത്തുന്നത്. അതിര്‍ത്തി ചെക്ക്‌പോസ്റ്റുകളില്‍ പരിശോധന ഇല്ലാത്തതിനാല്‍ ആര്‍ക്കും യഥേഷ്ടം ഇവ കൊണ്ടുവരാം എന്നതാണ് അവസ്ഥ.'
എന്‍ഡോസള്‍ഫാന്‍ ദുരന്തത്തിന്റെ പാഠം ഉള്‍ക്കൊണ്ടാണ് മാരകമായ കീടനാശിനികള്‍ കേരളം നിരോധിച്ചത്. ഹൈറേഞ്ചിലെ ഏലത്തോട്ടങ്ങളിലാണ് ഇവയുടെ ഉപയോഗം ഏറെയുള്ളത്. തളിക്കുന്ന തൊഴിലാളികള്‍ക്കുപോലും ആരോഗ്യപ്രശ്‌നങ്ങള്‍ സൃഷ്ടിക്കുന്ന ഇത്തരം കീടനാശിനികള്‍ ഏറെ സമ്മര്‍ദങ്ങളെത്തുടര്‍ന്നാണു നിരോധിച്ചത്.
ഇവ ഉപയോഗിച്ചാല്‍ ഏലത്തിന്റെ ഉല്‍പാദനത്തില്‍ വര്‍ധനയുണ്ടാകുമെന്നതാണു കര്‍ഷകരെ ഇതിലേക്ക് ആകര്‍ഷിക്കുന്നത്.
നിരോധിത കീടനാശിനികള്‍ ഏലത്തോട്ടങ്ങളില്‍ എത്തിച്ചു നല്‍കുന്ന ഏജന്റുമാര്‍ സജീവമാണ്.
ഏലത്തിന്റെ വേരുപുഴുവിനെ പ്രതിരോധിക്കാന്‍ ഉപയോഗിക്കുന്ന ഫോറേറ്റ്, ഫ്യുറഡാന്‍ എന്നിവ വന്‍തോതില്‍ പല സ്വകാര്യ തോട്ടങ്ങളിലും ശേഖരിച്ചുവയ്ക്കുന്നുണ്ട്.
ഏജന്റുമാര്‍ക്കു പുറമേ തോട്ടങ്ങളില്‍ പണിക്കെത്തുന്ന തൊഴിലാളികളാണ് നിരോധിത കീടനാശിനികള്‍ എത്തിക്കുന്നതിനുള്ള മറ്റൊരു മാര്‍ഗം.
തമിഴ്‌നാട്ടില്‍നിന്നു ദിവസേന വന്നു മടങ്ങുന്ന ഇവര്‍ അതിര്‍ത്തി ചെക്ക്‌പോസ്റ്റ് കടന്നുവരുമ്പോള്‍ പരിശോധന നടത്താറില്ല.
കീടനാശിനികള്‍ നിരോധിച്ചുകൊണ്ടുള്ള ഉത്തരവ് എത്തിയപ്പോള്‍ കുറെക്കാലത്തേക്കു കൃഷിവകുപ്പ് അതിര്‍ത്തി ചെക്ക്‌പോസ്റ്റില്‍ നിരീക്ഷണ സംവിധാനം ഒരുക്കിയിരുന്നു. എന്നാല്‍, ഇപ്പോള്‍ ഇത്തരം നിരീക്ഷണങ്ങളില്ല.