തിരൂരങ്ങാടി: സമസ്ത കേരള സുന്നി മഹല്ല് ഫെഡറേഷന് കീഴില്‍ ജനുവരി 30ന് ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റിയില്‍ നടക്കുന്ന എസ്.എം.എഫ് സംസ്ഥാന ഉമറാ കോണ്‍ഫറന്‍സില്‍ സംസ്ഥാനത്തെ വിവിധ മഹല്ലുകളില്‍ നിന്നുള്ള ആറായിരം പ്രതിനിധികള്‍ പങ്കെടുക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.

മഹല്ല് ജമാഅത്തുകളുടെ വളര്‍ച്ചയ്ക്ക് വേണ്ടി ബഹുമുഖ പദ്ധതികളാണ് സുന്നി മഹല്ല് ഫെഡറേഷന്റെ കീഴില്‍ നടപ്പിലാക്കി വരുന്നത്. അതിന്റെ ഭാഗമായി 30ന് ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി കാംപസില്‍ പ്രത്യേകം സജ്ജമാക്കുന്ന 'വാദീ അറഫ'യിലാണ് സംസ്ഥാന ഉമറാ കോണ്‍ഫറന്‍സ് നടക്കുക. മൂന്ന് സെഷനുകളിലായി രാവിലെ ഒന്‍പതു മുതല്‍ വൈകിട്ട് അഞ്ചു വരെയാണ് സംഗമം. പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനാകും. പ്രൊഫ. കെ. ആലിക്കുട്ടി മുസ്‌ലിയാര്‍ മുഖ്യ പ്രഭാഷണം നടത്തും.

11:30 ന് ആരംഭിക്കുന്ന 'സംതൃപ്ത കുടുംബം' സെഷന്‍ പാണക്കാട് റശീദലി ശിഹാബ് തങ്ങള്‍ ഉദ്ഘാടനം ചെയ്യും. എം.ടി അബ്ദുല്ല മുസ്‌ലിയാര്‍ അധ്യക്ഷനാകും. അബ്ദുസ്സമദ് പൂക്കോട്ടൂര്‍, എസ്.വി മുഹമ്മദലി മാസ്റ്റര്‍, ഹകീം മാസ്റ്റര്‍ തുടങ്ങിയവര്‍ വിഷയാവതരണം നടത്തും. ഉച്ചയ്ക്ക് രണ്ടു മണിക്ക് ' ധനകാര്യം: വിനിമയവും വിശുദ്ധിയും' സെഷന്‍ ടി.കെ പൂക്കോയ തങ്ങള്‍ ചന്തേര ഉദ്ഘാടനം ചെയ്യും. ഉമര്‍ ഫൈസി മുക്കം അധ്യക്ഷനാകും. ളിയാഉദ്ദീന്‍ ഫൈസി മേല്‍മുറി, മുനീര്‍ ഹുദവി ഫറോക്ക്, അബ്ദുറഹ്മാന്‍ പിലാത്തറ വിഷയാവതരണം നടത്തും.

3.30 ന് ആരംഭിക്കുന്ന 'സംഘര്‍ഷ രഹിത സമൂഹം' സെഷന്‍ സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. പി.പി ഉമര്‍ മുസ്‌ലിയാര്‍ അധ്യക്ഷനാകും. ആദൃശ്ശേരി ഹംസക്കുട്ടി മുസ്‌ലിയാര്‍, ബശീര്‍ വള്ളിക്കോത്ത്, ഡോ. സുബൈര്‍ ഹുദവി എന്നിവര്‍ വിഷയാവതരണം നടത്തും. സമാപന സെഷനില്‍ ഡോ.ബഹാഉദ്ദീന്‍ മുഹമ്മദ് നദ്‌വി 'വാദീ അറഫ' സന്ദേശപ്രഭാഷണവും നടത്തും. വാര്‍ത്താ സമ്മേളനത്തില്‍ യു.ശാഫി ഹാജി ചെമ്മാട്, കെ.എം സൈദലവി ഹാജി കോട്ടക്കല്‍, ഹംസ ഹാജി മൂന്നിയൂര്‍, എ.വി ഇസ്മാഈല്‍ ഹുദവി ചെമ്മാട് സംബന്ധിച്ചു.