തിരൂരങ്ങാടി: വിദ്യാര്‍ഥി സമൂഹത്തിന്റെ സര്‍ഗശേഷി മാറ്റുരച്ച് ദാറുല്‍ഹുദാ ഇസ്‌ലാമിക സര്‍വകലാശാലയുടെ സിബാഖ് ദേശീയ കലോത്സവത്തിന് ഇന്ന് കൊടിയേറ്റം. സംസ്ഥാനത്തെ ദാറുല്‍ഹുദായുടെ 24 അഫിലിയേറ്റഡ് സ്ഥാപനങ്ങളിലെയും പശ്ചിമ ബംഗാള്‍, അസം, മഹാരാഷ്ട്ര, ആന്ധ്രാപ്രദേശ്, കര്‍ണാടക തുടങ്ങിയ സംസ്ഥാനങ്ങളിലെ ദാറുല്‍ഹുദാ കാംപസുകളിലെയും യു.ജി കോളജുകളിലെയും ആറായിരത്തിലധികം വിദ്യാര്‍ഥികളെ പ്രതിനിധീകരിച്ച് രണ്ടായിരത്തിലധികം മത്സരാര്‍ഥികളാണ് 260 മത്സരയിനങ്ങളിലായി മാറ്റുരയ്ക്കുന്നത്. കലോത്സവത്തിന്റെ വിളംബരമറിയിച്ച് ഇന്ന് ഉച്ചക്ക് മൂന്നിന് ചെമ്മാട് ടൗണില്‍ റാലി നടക്കും. വൈകിട്ട് നാലിന് ദാറുല്‍ഹുദായുടെ ശില്‍പി യു. ബാപ്പുട്ടി ഹാജി, ചെറുശ്ശേരി സൈനുദ്ദീന്‍ മുസ്‌ലിയാര്‍ എന്നിവരുടെ മഖ്ബറകളില്‍ സിയാറത്ത് നടക്കും. തുടര്‍ന്ന് കോഴിക്കോട് ഖാസിയും ദാറുല്‍ഹുദാ വൈ.പ്രസിഡന്റുമായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി പതാക ഉയര്‍ത്തുന്നതോടെ സിബാഖ് കലാമാമാങ്കത്തിന് ഔദ്യോഗിക തുടക്കമാവും.
വൈകിട്ട് ഏഴിന് പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. വി.സി ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ മുഖ്യപ്രഭാഷണം നടത്തും.