കുട്ടനാട്: മഴക്കാലപൂര്‍വ രോഗ പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കുന്നതിന്റെ ഭാഗമായി മുട്ടാര്‍ ഗവ. ആയുര്‍വേദ ഡിസ്പന്‍സറിയില്‍ പ്രത്യേക ക്ലിനിക്ക് ആരംഭിച്ചു.
ഗ്രാമപഞ്ചായത്ത് പ്രസിഡന്റ് മാത്തുക്കുട്ടി ഈപ്പന്‍ ക്ലിനിക്ക് ഉദ്ഘാടനം ചെയ്തു. ആരോഗ്യ സ്റ്റാന്‍ഡിംഗ് കമ്മറ്റി ചെയര്‍മാന്‍ മാത്യു വര്‍ഗീസ് അധ്യക്ഷതവഹിച്ചു.
സീനിയര്‍ മെഡിക്കല്‍ ഓഫീസര്‍ ഡോ. വിനോദ് കൃഷ്ണന്‍ നമ്പൂതിരി ബോധവത്ക്കരണ ക്ലാസെടുത്തു. ക്ലിനിക്കിന്റെ പ്രവര്‍ത്തനം എല്ലാ ദിവസവും ഒ.പിയില്‍ ഉണ്ടാകും. പരിസര ശുചീകരണത്തിനൊപ്പം രോഗപ്രതിരോധ മരുന്നുകളും ക്ലിനിക്കിലൂടെ വിതരണം ചെയ്യും. അണുനാശിനിയായി അപരാജിതധൂപം പുകയ്ക്കുവാന്‍ നല്‍കും.
ഭാരതീയ ചികിത്സാ വകുപ്പുമായി സഹകരിച്ച് മുട്ടാര്‍ പഞ്ചായത്തിലെ വിവിധ ഭാഗങ്ങളില്‍ പകര്‍ച്ചവ്യാധി പ്രതിരോധ മെഡിക്കല്‍ ക്യാമ്പും നടത്തും. വൈസ്പ്രസിഡന്റ് ആന്‍സി തോമസ്, ജെസമ്മ ഫിലിപ്പ്, ജോഷിമോന്‍ ജോസഫ് എന്നിവര്‍ സംസാരിച്ചു.