കോഴിക്കോട്: ആരായിത്തീരണം എന്ന ചോദ്യത്തിനു 'ഫുട്‌ബോള്‍ പ്ലെയര്‍' ആകണം എന്നുപറഞ്ഞ തലമുറകളുടെ പിന്‍ഗാമികള്‍ ഇന്നും ആവേശം ഒട്ടുംചോരാതെ മലബാറിന്റെ ചെമ്മണ്‍പാതയോരങ്ങളില്‍ പന്തുതട്ടുന്നുണ്ട്. അതിനെ അന്വര്‍ഥമാക്കുകയായിരുന്നു ഇന്നലെ ഗോകുലം എഫ്.സി ഫുട്‌ബോള്‍ അക്കാദമിയിലേക്ക് അവസരം തേടി കോഴിക്കോട് ഇ.എം.എസ് സ്റ്റേഡിയത്തിലേക്ക് ഒഴുകിയെത്തിയ ആയിരങ്ങള്‍.
കാസര്‍കോട് മുതല്‍ മലപ്പുറം വരെയുള്ള അഞ്ചു മലബാര്‍ ജില്ലകളില്‍ നിന്നുള്ള കൗമാരപ്രായക്കാരായ കളിക്കാരെ കണ്ടെത്താനുള്ള പ്രാഥമിക തിരഞ്ഞെടുപ്പ് ഇന്നലെയായിരുന്നു. 18 വയസില്‍ താഴെ, പതിനഞ്ചില്‍ താഴെ, പതിമൂന്നില്‍ താഴെ എന്നിങ്ങനെ മൂന്നു വിഭാഗമാക്കിയായിരുന്നു തിരഞ്ഞെടുപ്പ്. എഫ്.സി അക്കാദമിയുടെ ഓണ്‍ലൈന്‍ പോര്‍ട്ടിലിലൂടെയും നേരിട്ടും രജിസ്റ്റര്‍ ചെയ്ത ആയിരത്തിലധികം വിദ്യാര്‍ഥികള്‍ സെലക്ഷന്‍ ട്രയലില്‍ പങ്കെടത്തു.
ഗോകുലത്തിന്റെ പരിശീലനത്തിലൂടെ ഐ ലീഗ്, സുബ്രതോ കപ്പ്, ഗോകുലം കേരള എഫ്.സി സെലക്ഷന്‍, കേരള ഫുട്‌ബോള്‍ അക്കാദമി ലീഗ്, റിലയന്‍സ് കപ്പ് തുടങ്ങിയ ക്ലബുകളിലേക്കുള്ള മത്സരത്തിനാണു തിരഞ്ഞെടുക്കപ്പെടുന്നവര്‍ക്ക് അവസരം ലഭിക്കുക. മധ്യകേരളത്തിലെ ജില്ലകള്‍ക്കു വേണ്ടി 27, 28 തിയതികളില്‍ തൃശൂരും തെക്കന്‍ ജില്ലകളില്‍ 30നു തിരുവനന്തപുരത്തും തിരഞ്ഞെടുപ്പ് നടക്കും. ഫുട്‌ബോള്‍ അസോസിയേഷനു കീഴില്‍ രജിസ്റ്റര്‍ ചെയ്ത ക്ലബുകളിലെ വിദ്യാര്‍ഥികള്‍ ഉള്‍പ്പെടെയുള്ള നിരവധി കുട്ടികള്‍ രക്ഷിതാക്കള്‍ക്കൊപ്പം സ്റ്റേഡിയത്തില്‍ എത്തിയിരുന്നു.