മാഡ്രിഡ്: എയ്ബറിനെ 4-1നു വീഴ്ത്തി റയല്‍ മാഡ്രിഡ് സ്പാനിഷ് ലാ ലിഗയില്‍ വിലപ്പെട്ട മൂന്നു പോയിന്റുകള്‍ സ്വന്തമാക്കി ബാഴ്‌സലോണയെ പിന്തള്ളി ഒന്നാം സ്ഥാനത്തേക്ക് കയറി. ക്രിസ്റ്റ്യാനോ റൊണാള്‍ഡോ, ഗെരത് ബെയ്ല്‍ എന്നിവരില്ലാതെ ഇറങ്ങിയ റയലിനായി കരിം ബെന്‍സമ ഇരട്ട ഗോളുകള്‍ നേടി. ശേഷിച്ച ഗോളുകള്‍ ജെയിംസ് റോഡ്രിഗസ്, മാര്‍ക്കോ അസെന്‍സിയോ എന്നിവരുടെ വകയായിരുന്നു. ജയത്തോടെ 59 പോയിന്റുകളുമായി റയല്‍ ഒന്നാം സ്ഥാനം തിരിച്ചുപിടിച്ചു. ഇത്രയും മത്സരങ്ങളില്‍ നിന്നു 57 പോയിന്റുമായി ബാഴ്‌സലോണ രണ്ടാമത്.

മറ്റു മത്സരങ്ങളില്‍ റയല്‍ സോസിഡാഡ് 3-2നു റയല്‍ ബെറ്റിസിനേയും ലെഗാനെസ് 1-0ത്തിനു ഗ്രനാഡയേയും വീഴ്ത്തി.

ലെയ്സ്റ്ററിന് ജയം; മാഞ്ചസ്റ്ററിനു സമനിലക്കുരുക്ക്

ലണ്ടന്‍: കോച്ച് റെനിയേരിയെ പുറത്താക്കിയതിനു ശേഷം കളിച്ച രണ്ടാം പോരാട്ടത്തിലും ലെയ്സ്റ്റര്‍ സിറ്റിക്കു ജയം. ഒന്നിനെതിരേ മൂന്നു ഗോളുകള്‍ക്ക് അവര്‍ ഹള്‍ സിറ്റിയെ വീഴ്ത്തി. അതേസമയം സ്വന്തം തട്ടകമായ ഓള്‍ഡ് ട്രാഫോര്‍ഡില്‍ മാഞ്ചസ്റ്റര്‍ യുനൈറ്റഡിനെ ബേണ്‍മൗത്ത് സമനിലയില്‍ തളച്ചു. 1-1നാണ് മാഞ്ചസ്റ്റര്‍ സമനില വഴങ്ങിയത്. മറ്റു മത്സരങ്ങളില്‍ സതാംപ്ടന്‍ ത്രില്ലര്‍ പോരാട്ടത്തില്‍ വാട്‌ഫോര്‍ഡിനെ 4-3നു പരാജയപ്പെടുത്തിയപ്പോള്‍ സ്റ്റോക് സിറ്റി 2-0ത്തിനു മിഡ്ഡ്ല്‍സ്‌ബ്രൊയേയും സ്വാന്‍സീ സിറ്റി 3-2നു ബേണ്‍ലിയേയും ക്രിസ്റ്റല്‍ പാലസ് 2-0ത്തിനു വെസ്റ്റ് ബ്രോംവിചിനേയും കീഴടക്കി.

എതിരില്ലാതെ ബയേണ്‍ മ്യൂണിക്ക്

മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബയേണിനു വിജയം. മറുപടിയില്ലാത്ത മൂന്നു ഗോളുകള്‍ക്ക് അവര്‍ കൊളോണിനെ വീഴ്ത്തി. ജാവി മാര്‍ട്ടിനെസ്, യുവാന്‍ ബെര്‍ണാട്, ഫ്രാങ്ക് റിബറി എന്നിവരാണു ബാവേറിയന്‍സിനായി വല ചലിപ്പിച്ചത്. അതേസമയം രണ്ടാം സ്ഥാനത്തുള്ള ലെയ്പ്‌സിഗിനെ ഓഗ്‌സ്ബര്‍ഗ് 2-2നു സമനിലയില്‍ തളച്ചതു അവര്‍ക്ക് തിരിച്ചടിയായി. പോയിന്റ് പട്ടികയില്‍ 23 മത്സരങ്ങളില്‍ നിന്നു 56 പോയിന്റുമായി ബയേണ്‍ മുന്നില്‍. ഏഴു പോയിന്റ് കുറവില്‍ 49 പോയിന്റുമായി ലെയ്പ്‌സിഗ് രണ്ടാമത്. ബയര്‍ ലെവര്‍കൂസനെ 6-2 തകര്‍ത്ത് ബൊറൂസിയ ഡോര്‍ട്മുണ്ട് മൂന്നാം സ്ഥാനത്തേക്കും ഇംഗോള്‍സ്റ്റഡിനെ 5-2നു കീഴടക്കി ഹോഫെന്‍ഹെയിം നാലാം സ്ഥാനത്തേക്കും കയറി. ഇരു ടീമുകളും ബയേണിനു വലിയ ഭീഷണിയല്ലെങ്കിലും ലെയ്പ്‌സിഗിന്റെ രണ്ടാം സ്ഥാനത്തിനു കനത്ത ഭീഷണിയുണ്ട്. മറ്റു മത്സരങ്ങളില്‍ വെര്‍ഡര്‍ ബ്രെമന്‍ 2-0ത്തിനു ഡാംസ്റ്റഡിനെ വീഴ്ത്തിയപ്പോള്‍ വോള്‍വ്‌സ്ബര്‍ഗ്- മെയ്ന്‍സ് പോരാട്ടം 1-1നു സമനില.

റോമയെ വീഴ്ത്തി നാപോളി

മിലാന്‍: ഇറ്റാലിയന്‍ സീരി എയില്‍ രണ്ടാം സ്ഥാനത്തുള്ള റോമയെ മൂന്നാമതുള്ള നാപോളി വീഴ്ത്തി. 2-1നാണു റോമ തട്ടകത്തില്‍ തോല്‍വി രുചിച്ചത്. തോറ്റെങ്കിലും റോമയുടെ രണ്ടാം സ്ഥാനത്തിനു താത്കാലം ഭീഷണിയില്ല.

കിരീടപ്പോരാട്ടം കടുപ്പിച്ച് ഈസ്റ്റ് ബംഗാളും ഐസ്വാളും

ഐസ്വാള്‍: ഐ ലീഗില്‍ കിരീടപ്പോരാട്ടം കനപ്പിച്ച് ഈസ്റ്റ് ബംഗാളും ഐസ്വാളും. 12ാം പോരാട്ടത്തില്‍ ഐസ്വാള്‍ 2-0ത്തിനു മുംബൈയേയും ഈസ്റ്റ് ബംഗാള്‍ 2-1നു ഷില്ലോങ് ലജോങിനേയും പരാജയപ്പെടുത്തി. അതേസമയം കരുത്തരായ മോഹന്‍ ബഗാനെ 2-1നു ചര്‍ച്ചില്‍ ബ്രദേഴ്‌സ് വീഴ്ത്തി.
നാലു മത്സരങ്ങള്‍ ബാക്കി നില്‍ക്കേ 27 പോയിന്റുമായി ഈസ്റ്റ് ബംഗാള്‍ ഒന്നാമതും ഒരു പോയിന്റ് കുറവില്‍ 26 പോയിന്റുമായി ഐസ്വാള്‍ രണ്ടാം സ്ഥാനത്തും നില്‍ക്കുന്നു. മൂന്നാമതുള്ള മോഹന്‍ ബഗാനും ആശയ്ക്ക് വകയുണ്ട്. രണ്ടു മത്സരങ്ങള്‍ കുറച്ചു കളിച്ച അവര്‍ക്ക് 21 പോയിന്റുകളുണ്ട്. ഇനിയുള്ള നാലു മത്സരങ്ങള്‍ മൂന്നു ടീമുകള്‍ക്കും നിര്‍ണായകം.