ദോഹ: അവധിയിലായിരിക്കെ തൊഴിലാളികളെ പിരിച്ചു വിടാന്‍ പാടില്ലെന്ന് തൊഴിലുടമകള്‍ക്ക് ഭരണനിര്‍വഹണ വികസനതൊഴില്‍സാമൂഹിക കാര്യ മന്ത്രാലയത്തിന്റെ നിര്‍ദേശം. പുതിയ തൊഴില്‍ നിയമത്തിന്റെ 84, 85 അനുഛേദങ്ങള്‍ ഉദ്ധരിച്ചാണ് മന്ത്രാലയം ഇക്കാര്യം വ്യക്തമാക്കിയത്. പുതിയ തൊഴില്‍നിയമത്തിലെ തൊഴിലാളികളുടെ അവധിയുമായി ബന്ധപ്പെട്ട രണ്ടു സുപ്രധാന വ്യവസ്ഥകളുടെ വിശദാംശങ്ങള്‍ മന്ത്രാലയം കഴിഞ്ഞദിവസങ്ങളില്‍ സാമൂഹികമാധ്യമങ്ങളിലുടെയാണ് വിശദീകരിച്ചത്. ഇതുപ്രകാരം അവധിയില്‍ പോയിരിക്കുന്ന തൊഴിലാളികളെ പിരിച്ചു വിടാന്‍ തൊഴിലുടമയ്ക്ക് അധികാരമില്ല. അതുപോലെതന്നെ അവധി സമയത്ത് മറ്റൊരു തൊഴിലുടമയുടെ കീഴില്‍ തൊഴിലാളികള്‍ ജോലി ചെയ്യാന്‍ പാടില്ലെന്നും നിയമം വ്യവസ്ഥ ചെയ്യുന്നു.

തൊഴിലുടമയെയും തൊഴിലാളിയെയും ഒരുപോലെ ബാധിക്കുന്നതാണ് ഈ രണ്ടുവ്യവസ്ഥകളും. തൊഴിലാളി അവധിയിലായിരിക്കെ തൊഴിലുടമയ്ക്ക് പിരിച്ചുവിടാനാകില്ലെന്ന് പുതിയ നിയമത്തിലെ 85ാം വകുപ്പിലാണ് പറയുന്നത്. അവധിയിലിരിക്കെ സേവന കരാര്‍ റദ്ദാക്കാന്‍ പാടില്ല. അവധിക്കിടെ നോട്ടീസ് കാലാവധി അവസാനിക്കുന്ന രൂപത്തില്‍ പിരിച്ചുവിടല്‍ നോട്ടീസ് നല്‍ാകനും പാടില്ല.
തന്റെ അവധി സമയത്ത് മറ്റൊരു തൊഴിലുടമയ്ക്കുവേണ്ടി ജോലി ചെയ്യാന്‍ തൊഴിലാളിക്ക് അവകാശമില്ലെന്ന് നിയമത്തിലെ 84ാം വകുപ്പിലാണു പറയുന്നത്. ഈ വ്യവസ്ഥക്ക് എതിരായി തൊഴിലാളി പ്രവര്‍ത്തിച്ചതായി തെളിവു സഹിതം ബോധ്യപ്പെട്ടാല്‍ അവധിക്കാലത്തെ തൊഴിലാളിയുടെ വേതനം നല്‍കേണ്ടതില്ലെന്നും മുന്‍കൂറായി വേതനം നല്‍കിയിട്ടുണ്ടെങ്കില്‍ അത് തിരിച്ചെടുക്കാമെന്നും നിയമം വ്യവസ്ഥ ചെയ്യുന്നു.