കൊച്ചി: യുവനടിയെ ആക്രമിച്ച കേസില്‍ നടി മഞ്ജു വാര്യരുടെ മൊഴി ഇന്ന് രേഖപ്പെടുത്തും. നടന്‍ സിദ്ദിഖ്, നടി ബിന്ദു പണിക്കര്‍ എന്നിവരുടെ മൊഴിയും ഇന്ന് എടുക്കും. 

കേസില്‍ നടന്‍ ദിലീപിനെതിരേ ഉന്നയിച്ചിരിക്കുന്ന ഗൂഢാലോചനാക്കുറ്റം തെളിയിക്കുന്നതിന്റെ ഭാഗമായാണ് ഇവരില്‍ നിന്നും മൊഴിയെടുക്കുന്നത്. മഞ്ജുവിനു പുറമേ കുഞ്ചാക്കോ ബോബന്‍, സംയുക്താ വര്‍മ, ഗീതു മോഹന്‍ദാസ് എന്നിവരുടെ മൊഴികള്‍ നാളെ രേഖപ്പെടുത്തും. സംവിധായകന്‍ ശ്രീകുമാര്‍ മോനോന്റെ മൊഴി 29 നും ഗായിക റിമി ടോമിയുടെ മൊഴി അടുത്ത മാസം നാലിനും രേഖപ്പെടുത്തും. മൊഴി നല്‍കുന്നവരെ പ്രതിഭാഗം അഭിഭാഷകര്‍ക്ക് വിസ്തരിക്കാനും അവസരമുണ്ട്. എറണാകുളം സി.ബി.ഐ പ്രത്യേക കോടതിയില്‍ രഹസ്യമായാണ് മൊഴിയെടുക്കലും വിസ്താരവും നടക്കുക. കുറ്റകൃത്യം നടക്കുമ്പോള്‍ ഉപയോഗിച്ചിരുന്ന ടെമ്പോ ട്രാവലര്‍ വാടകയ്ക്കു നല്‍കിയയാളുടെ മൊഴി ഇന്നലെ രേഖപ്പെടുത്തി.