പാലക്കാട്: വര്‍ഗീയ വിദ്വേഷം പരത്തുന്ന തരത്തില്‍ ഫേസ്ബുക്കില്‍ വിഡിയോ ഇട്ട സംഘ്പരിവാറുകാരനെ അഗളി പൊലിസ് അറസ്റ്റ് ചെയ്തു. അട്ടപ്പാടി കള്ളമല പടിഞ്ഞാറേക്കര വീട്ടില്‍ ശ്രീജിത് രവീന്ദ്രനെയാണ് അഗളി പൊലിസ് അറസ്റ്റ് ചെയ്തത്. ഇയാള്‍ക്കെതിരേ എസ്.കെ.എസ്.എസ്.എഫ്, ഡി.വൈ.എഫ്.ഐ, യൂത്ത് കോണ്‍ഗ്രസ്, യൂത്ത് ലീഗ് എന്നിവര്‍ നല്‍കിയ പരാതിയെ തുടര്‍ന്നാണ് നടപടി.

മതസ്പര്‍ദ്ധ വളര്‍ത്താന്‍ ശ്രമിച്ചെന്ന കുറ്റത്തിന് 153 എ പ്രകാരമാണ് കേസെടുത്തത്. പൗരത്വ നിയമ ഭേദഗതിക്കെതിരേ ഷഹീന്‍ബാഗില്‍ സമരം നടത്തുന്നവര്‍ക്കെതിരേ വര്‍ഗീയ വിദ്വേഷം പരത്തുന്ന തരത്തിലായിരുന്നു യുവാവിന്റെ വിഡിയോ. ചൊവ്വാഴ്ച വൈകീട്ടാണ് ഫേസ്ബുക്കില്‍ കൊലവിളി വിഡിയോ പോസ്റ്റ് ചെയ്തത്. അമേരിക്കന്‍ പ്രസിഡന്റ് ഡോണാള്‍ഡ് ട്രംപ് ഇന്ത്യ വിടുന്നതോടെ പ്രതിഷേധക്കാരെ വെടിവച്ചു കൊല്ലുമെന്നായിരുന്നു ഭീഷണി. 

ഇയാള്‍ക്കെതിരേ നടപടിയെടുക്കണമെന്നാവശ്യപ്പെട്ട് സമൂഹമാധ്യമങ്ങളിലും പ്രതിഷേധം ശക്തമായിരുന്നു. അഗളി സി.ഐ ഹിദായത്തുല്ല മാമ്പ്രയുടെ നേതൃത്വത്തില്‍ എസ്.ഐ ഷേണു, സി.പി.ഒമാരായ അന്‍വര്‍, അശ്വതി, പണലി, ജയന്‍ തുടങ്ങിയവരാണ് അറസ്റ്റിന് നേതൃത്വം നല്‍കിയത്. 

 

 

 

പാലക്കാട്: കാക്കിക്കുള്ളിലെ കലാബോധവും നര്‍മവും പലതവണ പലരീതിയില്‍ പ്രകടമാക്കിയിട്ടുണ്ട് കേരളാ പൊലിസ് ഫേസ്ബുക്ക് പേജിലൂടെ. ഇപ്പോള്‍ പൊലിസിന്റെ ഫേസ്ബുക്ക് പേജിലിട്ട, വൈറലാകുന്ന ട്രോള്‍ വിഡിയോ നര്‍മത്തിനും തമാശയ്ക്കുമപ്പുറം വളരെ ഗൗരവതരമുമാണ്. 

വര്‍ഗീയ വിദ്വേഷം പരത്തുന്ന തരത്തില്‍ ഫേസ്ബുക്കില്‍ വിഡിയോ ഇട്ട യുവാവിനെ അഗളി പൊലിസ് അറസ്റ്റ് ചെയ്തതുമായി ബന്ധപ്പെട്ട് കേരളാ പൊലിസ് തങ്ങളുടെ ഔദ്യോഗിക ഫേസ്ബുക്ക് പേജില്‍ പോസ്റ്റ് ചെയ്ത ട്രോള്‍ വിഡിയോ ആണ് വൈറലാകുന്നത്. 

ഞങ്ങളിങ്ങ് എടുത്തു കേട്ടോ...'  എന്ന തലവാചകവുമായി മലയാള ചലച്ചിത്രങ്ങളിലെ വ്യത്യസ്ത ഭാഗങ്ങളും 'വറാ വറാം പൂച്ചാണ്ടി റയില് വണ്ടിയില്' എന്ന തമിഴ് പാട്ടും ഉള്‍പ്പെടുത്തിയാണ് ട്രോള്‍. മണിക്കൂറുകള്‍കൊണ്ട് ലക്ഷക്കണക്കിനാളുകള്‍ കാണുകയും പതിനായിരത്തിലധികം ആളുകള്‍ പങ്കുവയ്ക്കുകയും ചെയ്ത വിഡിയോയ്ക്ക്  ആയിരക്കണക്കിന് കമന്റുകളിലൂടെ അഭിനന്ദന പ്രവാഹവുമുണ്ടായി.