ഉപ്പള: ദേശീയ പാതയില്‍ കാറുകള്‍ തമ്മില്‍ കൂട്ടിയിടിച്ച് കാസര്‍കോട് ആലംപാടി സ്വദേശി മരിച്ചു. ഉപ്പള റെയില്‍വെ ഗേറ്റിന് സമീപം സന്ധ്യയോടെയാണ് അപകടം. ആലംപാടിയിലെ ഖാസി അബ്ദുല്ലയുടെ മകന്‍ റസാഖ് (33) ആണ് മരിച്ചത്.

കോഴിക്കോട്ടുനിന്നും ഹരിയാനയിലേക്ക് പോവുകയായിരുന്ന കസ്റ്റംസ് ഓഫിസര്‍ വിപിന്‍ രാഘവ് സഞ്ചരിച്ച കാര്‍ മഞ്ചേശ്വരം ഭാഗത്ത് നിന്ന് കാസര്‍കോട്ടേക്ക് വരികയായിരുന്ന റസാഖ് സഞ്ചരിച്ച കാറും തമ്മിലാണ് കൂട്ടിയിടിച്ചത്. ഗുരുതരമായ പരുക്കേറ്റ ഇരുവരെയും ഓടിക്കൂടിയ നാട്ടുകാര്‍ ഉടന്‍ തന്നെ മംഗളൂരു ആശുപത്രിയില്‍ എത്തിച്ചെങ്കിലും റസാഖ് മരിച്ചിരുന്നു.

സൗദിയില്‍ ജോലി ചെയ്യുന്ന റസാഖ് മാസങ്ങള്‍ക്ക് മുമ്പാണ് സഹോദരന്‍ അസീസിന്റെ വിവാഹത്തിനായി നാട്ടിലെത്തിയത്. മൃതദേഹം പോസ്റ്റുമോര്‍ട്ടത്തിനായി കാസര്‍കോട് ജനറല്‍ ആശുപത്രിയിലേക്ക് മാറ്റും.