ദോഹ: ഷഹാനിയ ലേബര്‍ ക്യാംമ്പിലുണ്ടായ തീപ്പിടുത്തത്തില്‍ നിരവധി പ്രവാസി തൊഴിലാളികള്‍ക്ക് വിലപ്പെട്ട വസ്തുക്കളും രേഖകളും നഷ്ടമായി. വെള്ളിയാഴ്ച ഉച്ചയ്ക്കു ശേഷമുണ്ടായ തീപ്പിടിത്തത്തില്‍ തലനാരിഴക്കാണ് തൊഴിലാളികള്‍ രക്ഷപ്പെട്ടത്. 320 ഫിലിപ്പിനോകള്‍ ഉള്‍പ്പെടെ അഞ്ഞൂറിലധികം തൊഴിലാളികളാണ് ക്യാംപിലുണ്ടായിരുന്നത്. വെള്ളിയാഴ്ച വൈകിട്ട് നാലരയോടെയായിരുന്നു തീപ്പിടിത്തം തൊഴിലാളി പാര്‍പ്പിട സമുച്ചയത്തിലെ രണ്ട്, മൂന്ന് നിലകളില്‍ തീപ്പിടുത്തം സാരമായി ബാധിച്ചതായി ദൃക്‌സാക്ഷികള്‍ പറഞ്ഞു. സിവില്‍ ഡിഫന്‍സിന്റെ തക്ക സമയത്തുള്ള ഇടപെടലാണ് കൂടുതല്‍ നാശനഷ്ടവും ജീവഹാനിയും ഒഴിവാക്കിയത്.

തീപ്പിടിത്തത്തെ തുടര്‍ന്ന് തൊഴിലാളികളെ മറ്റ് കേന്ദ്രങ്ങളിലേക്ക് മാറ്റി. നിരവധി പേര്‍ക്ക് പാസ്‌പോര്‍ട്ട് ഉള്‍പ്പെടെയുള്ള വിലപ്പെട്ട രേഖകളും വസ്ത്രങ്ങള്‍ ഉള്‍പ്പെടെയുള്ള മറ്റു മുഴുവന്‍ നിത്യോപയോഗ സാധനങ്ങളും നഷ്ടമായി. ക്ലീനര്‍മാരും ടീ ബോയിമാരുമാണ് ക്യാംപില്‍ താമസിച്ചിരുന്നവരില്‍ ഭൂരിഭാഗവുമെന്ന് ഫിലിപ്പീന്‍ ലേബര്‍ അറ്റാഷെ ഡേവിഡ് ഡെസ് ഡിസാങ് പറഞ്ഞു.

ഫിലിപ്പിനോ എംബസിയില്‍ നിന്ന് പാസ്‌പോര്‍ട്ട് നഷ്ടപ്പെട്ട തങ്ങളുടെ പൗരന്മാര്‍ക്ക് വേണ്ട സഹായം നല്‍കിയിട്ടുണ്ട്. ആവശ്യമായ വസ്ത്രങ്ങളും ഭക്ഷണവും എംബസി നല്‍കുകയും ചെയ്തു. ഡസാങ് ഉള്‍പ്പെടെയുള്ള ഫിലിപ്പീന്‍ എംബസി പ്രതിനിധികളും മറ്റു സാമൂഹിക പ്രവര്‍ത്തകരും ക്യാംപ് സന്ദര്‍ശിച്ചു. ഇന്ത്യക്കാരായ പ്രവാസികള്‍ക്ക് ഇന്ത്യന്‍ കമ്യൂണിറ്റി ബെനവലന്റ് ഫോറത്തില്‍ നിന്ന് വസ്ത്രങ്ങളും ഭക്ഷണവും വിതരണം ചെയ്തു. സാമൂഹിക പ്രവര്‍ത്തകരും സഹായ സന്നദ്ധരായി രംഗത്തെത്തിയിട്ടുണ്ട്. സോഷ്യല്‍ മീഡിയ വഴി ഇവര്‍ സഹാത്തിന് ആഹ്വാനം ചെയ്തു.