തൊടുപുഴ: വിവാഹ വാഗ്ദാനം നല്‍കി പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി പലയിടങ്ങളിലായി പാര്‍പ്പിച്ചു പീഡിപ്പിച്ച യുവാവിനെ പൊലിസ് അറസ്റ്റ് ചെയ്തു. കട്ടപ്പനയ്ക്കടുത്ത് പുളിയന്മലയിലെ എസ്റ്റേറ്റ് തൊഴിലാളിയായ തമിഴ്‌നാട് കമ്പം സ്വദേശി പാണ്ഡ്യ(26)നെയാണ് കട്ടപ്പന സി.ഐ വി.എസ് അനില്‍കുമാറിന്റെ നേതൃത്വത്തില്‍ അറസ്റ്റ് ചെയ്തത്. പെണ്‍കുട്ടിയെ കഴിഞ്ഞ 22 മുതല്‍ കാണാതായിരുന്നു. ഇതു സംബന്ധിച്ച് വണ്ടന്മേട് പൊലിസില്‍ വീട്ടുകാര്‍ പരാതി നല്‍കി. എസ്.ഐ കെ.വി വിശ്വനാഥന്റെ നേതൃത്വത്തില്‍ പൊലിസ് നടത്തിയ അന്വേഷണത്തില്‍ പെണ്‍കുട്ടിയുമായി പാണ്ഡ്യന്‍ പോയതായി വിവരം ലഭിച്ചു. തുടര്‍ന്ന് സി.ഐയുടെ നേതൃത്വത്തിലുള്ള സംഘം വിവിധ സ്ഥലങ്ങളില്‍ നടത്തിയ തെരച്ചിലില്‍ തമിഴ്‌നാട്ടിലെ ഉസലംപെട്ടിയില്‍നിന്നാണ് ഇരുവരെയും കസ്റ്റഡിയിലെടുത്തത്. പെണ്‍കുട്ടിക്ക് 17 വയസ് പൂര്‍ത്തിയായിട്ടില്ലെന്നും വിവാഹം കഴിക്കാമെന്നു വിശ്വസിപ്പിച്ച് തമിഴ്‌നാട്, ആന്ധ്ര തുടങ്ങിയ സംസ്ഥാനങ്ങളില്‍ പലയിടത്തായി ചുറ്റിക്കറങ്ങി പീഡിപ്പിക്കുകയായിരുന്നെന്നും പൊലിസിന് തെളിവ് ലഭിച്ചു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.