ജിദ്ദ: ഇന്ത്യ അടക്കമുള്ള രാജ്യങ്ങളിൽ നിന്നുള്ള ഗാർഹിക തൊഴിലാളികളെ റിക്രൂട്ട് ചെയ്ത് എത്തിച്ചു നൽകുന്നതിന് സഊദിയിലെ റിക്രൂട്ട്‌മെന്റ് സ്ഥാപനങ്ങൾ ഈടാക്കുന്ന തുകയിൽ വൻ വർധനവ്. 

ഇന്ത്യ, ബംഗ്ലാദേശ്, ശ്രീലങ്ക, കെനിയ എന്നീ രാജ്യങ്ങളിൽ നിന്നുള്ള തൊഴിലാളികളെ റിക്രൂട്ട് ചെയ്ത് എത്തിച്ചു നൽകുന്നതിന് സഊദിയിലെ റിക്രൂട്ട്‌മെന്റ് സ്ഥാപനങ്ങൾ ഈടാക്കുന്ന നിരക്ക് 100 റിയാൽ മുതൽ 1000 റിയാൽ വരെ കഴിഞ്ഞ മാസം ഉയർന്നതായി ഗാർഹിക തൊഴിലാളി റിക്രൂട്ട്‌മെന്റ് നടപടികൾക്കുള്ള മുസാനിദ് പോർട്ടൽ വ്യക്തമാക്കുന്നു. ഇന്ത്യയിൽ നിന്ന് ഗാർഹിക തൊഴിലാളിയെ റിക്രൂട്ട് ചെയ്ത് എത്തിച്ചു നൽകുന്നതിനുള്ള നിരക്ക് 17,000 റിയാലായി ഉയർന്നിട്ടുണ്ട്. 

ഡിസംബറിൽ ഇത് 16,000 റിയാലായിരുന്നു. ശ്രീലങ്കയിൽ നിന്നുള്ള റിക്രൂട്ട്‌മെന്റ് നിരക്ക് 14,000 റിയാലിൽ നിന്ന് 15,000 റിയാലായും കെനിയയിൽ നിന്നുള്ള റിക്രൂട്ട്‌മെന്റ് നിരക്ക് 7800 റിയാലിൽ നിന്ന് 7900 റിയാലായും ഉയർന്നിട്ടുണ്ട്. ഫിലിപ്പൈൻസിൽ നിന്ന് ഗാർഹിക തൊഴിലാളിയെ റിക്രൂട്ട് ചെയ്യുന്നതിനുള്ള നിരക്ക് 13,900 റിയാലായി മാറ്റമില്ലാതെ തുടർന്നു. ഉഗാണ്ടയിൽ നിന്ന് വേലക്കാരെ റിക്രൂട്ട് ചെയ്യുന്നതിനുള്ള നിരക്ക് ജനുവരിയിൽ കുറഞ്ഞു. 6900 റിയാലായാണ് കുറഞ്ഞത്. ഉഗാണ്ടയിൽ നിന്നുള്ള റിക്രൂട്ട്‌മെന്റ് നിരക്ക് ഡിസംബറിൽ 6998 റിയാലായിരുന്നു. 

ജനുവരിയിൽ ഏറ്റവും കൂടുതൽ ഗാർഹിക തൊഴിലാളികളെ റിക്രൂട്ട് ചെയ്തത് ഈജിപ്തിൽ നിന്നും ഫിലിപ്പൈൻസിൽ നിന്നുമാണ്. ആകെ റിക്രൂട്ട് ചെയ്ത ഗാർഹിക തൊഴിലാളികളിൽ 18 ശതമാനം പേർ ഈജിപ്തുകാരും 18 ശതമാനം പേർ ഫിലിപ്പിനോകളുമാണ്. 17 ശതമാനം തൊഴിലാളികളെ ബംഗ്ലാദേശിൽ നിന്നും 13 ശതമാനം തൊഴിലാളികളെ ഉഗാണ്ടയിൽ നിന്നും റിക്രൂട്ട് ചെയ്തു. 

ഡിസംബറിനെ അപേക്ഷിച്ച് ജനുവരിയിൽ ബംഗ്ലാദേശിൽ നിന്നുള്ള റിക്രൂട്ട്‌മെന്റ് കുറഞ്ഞു. ഡിസംബറിൽ ആകെ റിക്രൂട്ട് ചെയ്ത ഗാർഹിക തൊഴിലാളികളിൽ 22 ശതമാനം ബംഗ്ലാദേശുകാരായിരുന്നു. ഉഗാണ്ടയിൽ നിന്നുള്ള റിക്രൂട്ട്‌മെന്റ് 11 ശതമാനത്തിൽ നിന്ന് 13 ശതമാനമായി ജനുവരിയിൽ ഉയർന്നു. ഇന്ത്യ അടക്കമുള്ള മറ്റു രാജ്യങ്ങളിൽ നിന്ന് 34 ശതമാനം ഗാർഹിക തൊഴിലാളികളെയാണ് കഴിഞ്ഞ മാസം റിക്രൂട്ട് ചെയ്തത്. 

ജനുവരിയിൽ റിക്രൂട്ട് ചെയ്ത ഗാർഹിക തൊഴിലാളികളിൽ 48 ശതമാനം പേർ വേലക്കാരികളാണ്. ഡിസംബറിൽ റിക്രൂട്ട് ചെയ്ത ഗാർഹിക തൊഴിലാളികളിൽ 54 ശതമാനം പേർ വേലക്കാരികളായിരുന്നു. ഡിസംബറിലും ജനുവരിയിലും റിക്രൂട്ട് ചെയ്ത ഗാർഹിക തൊഴിലാളികളിൽ 28 ശതമാനം പേർ ഹൗസ് ഡ്രൈവർമാരാണ്. ജനുവരിയിൽ റിക്രൂട്ട് ചെയ്ത പുരുഷ ഗാർഹിക തൊഴിലാളികളുടെ എണ്ണം 16 ശതമാനത്തിൽ നിന്ന് 22 ശതമാനമായി ഉയർന്നു. അവശേഷിക്കുന്നവർ ഹോം നഴ്‌സ്, പാചകക്കാർ അടക്കമുള്ള പ്രൊഫഷനുകളിൽ പെട്ട ഗാർഹിക തൊഴിലാളികളാണ്.