തേഞ്ഞിപ്പലം: വാട്ടര്‍ അതോറിറ്റിയുടെ ജലവിതരണ പൈപ്പിന്റെ വാള്‍വ് അജ്ഞാതര്‍ തകര്‍ത്തത് മൂലം തേഞ്ഞിപ്പലം ചെറുതൊടി കോളനിക്കാര്‍ കുടിവെള്ളം കിട്ടാതെ ദുരിതത്തില്‍.  രണ്ടാഴ്ചയിലേറെയായി വാട്ടര്‍ അതോറിറ്റിയുടെ ഇങ്ങോട്ടുള്ള ജലവിതരണം നിലച്ചിട്ട്. വാള്‍വ് കേടായ വിവരം പരപ്പനങ്ങാടി ഓവര്‍സിയറെയും ചേളാരി വാട്ടര്‍ അതോറിറ്റി അധികൃതരെയും പലതവണ അറിയിച്ചതായി കോളനി വാസികള്‍ പറയുന്നു. നാളെ മുതല്‍ വെള്ളമെത്തും എന്നു പറഞ്ഞ് കളിപ്പിക്കുന്ന സമീപനമാണ് അധികൃതരുടേതെന്ന് ഇവര്‍ പരാതിപ്പെടുന്നു. കേടായ വാള്‍വ് നന്നാക്കാന്‍ പോലും അധികൃതര്‍ ഇതുവരെ തയാറായിട്ടില്ല. മുപ്പതോളം കുടുംബങ്ങള്‍ താമസിക്കുന്ന ചെറുതൊടി കോളനിയിലെ  കിണറുകള്‍ വറ്റിയ നിലയിലാണ്. ശുദ്ധജലം ലഭിക്കാതെ പ്രാഥമിക ആവശ്യങ്ങള്‍ നിര്‍വ്വഹിക്കാന്‍ പോലും കഷ്ടപ്പെടുകയാണിവര്‍.