കൊയിലാണ്ടി: എസ്.കെ.എസ്.എസ്.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ നാളെ കൊയിലാണ്ടി സ്‌പോര്‍ട്‌സ് കൗണ്‍സില്‍ സ്റ്റേഡിയത്തില്‍ നടക്കുന്ന ട്രൈസനേറിയം സമ്മിറ്റിന്റെ ഒരുക്കങ്ങള്‍ പൂര്‍ത്തിയായി. സംഘടനയുടെ 30 ാം വാര്‍ഷികാഘോഷങ്ങളുടെ സമാപനമായാണ് പരിപാടി സംഘടിപ്പിക്കുന്നത്. രാവിലെ 9.30ന് ആരംഭിക്കുന്ന പരിപാടി വൈകിട്ട് അഞ്ചിന്് സമാപിക്കും. സയ്യിദ് അബ്ബാസലി ശിഹാബ് തങ്ങളുടെ അധ്യക്ഷതയില്‍ പരിപാടി സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും. ജന. സെക്രട്ടറി പ്രൊഫ. കെ. ആലികുട്ടി മുസ്‌ലിയാര്‍ അനുഗ്രഹ ഭാഷണം നിര്‍വഹിക്കും. കെ. മുരളീധരന്‍ എം.പി മുഖ്യാതിഥിയായിരിക്കും. എ.വി അബ്ദുറഹ്മാന്‍ മുസ്‌ലിയാര്‍, കെ. ഉമര്‍ ഫൈസി മുക്കം, കെ. ദാസന്‍ എം.എല്‍.എ, സയ്യിദ് ഹുസൈന്‍ ബാഫഖി തങ്ങള്‍ സംബന്ധിക്കും.
തുടര്‍ന്ന് അബ്ദുസ്സലാം ഫൈസി ഒളവട്ടൂര്‍ തര്‍ബിയ സെഷന് നേതൃത്വം നല്‍കും. 'നാം നമ്മുടെ പ്രസ്ഥാനം' എന്ന വിഷയത്തില്‍ ഓപ്പണ്‍ ഫോറം നടക്കും. ഉച്ചയ്ക്ക് ശേഷം ആരംഭിക്കുന്ന 'നമ്മുടെ കര്‍മ മേഖല' സെഷന്‍ സയ്യിദ് ഹമീദലി ശിഹാബ് തങ്ങളുടെ അധ്യക്ഷതയില്‍ എം.ടി അബ്ദുല്ല മുസ്‌ലിയാര്‍ ഉദ്ഘാടനം ചെയ്യും. ഡോ. കെ.ടി.എം ബശീര്‍ പനങ്ങാങ്ങര ചര്‍ച്ചക്ക് നേതൃത്വം നല്‍കും.
തുടര്‍ന്ന് 'മതം മതേതര ഇന്ത്യക്ക്' സൗഹൃദ സംവാദം നടക്കും. സയ്യിദ് സാദിഖലി ശിഹാബ് തങ്ങള്‍, ഡോ. ശ്രീ. ശ്രീ ആര്യ മഹര്‍ഷി, ഫാദര്‍ ഡോ. ജെറോം ചിങ്ങന്തറ എന്നിവര്‍ സന്ദേശങ്ങള്‍ കൈമാറും.
വൈകിട്ട് ഏഴിന്് സംഘടനയുടെ 2020-22 ലേക്കുള്ള സംസ്ഥാന കൗണ്‍സില്‍ ചേര്‍ന്ന് പുതിയ സംസ്ഥാന ഭാരവാഹികളെ തെരഞ്ഞെടുക്കും.